«البس واشرب.. والـWi-Fi علينا»: شباب وكالة البلح يروجون لملابس العيد
«الشاطرة تغزل برجل حمار»، موروث شعبى طبقه 3 شباب من بائعى شارع 26 يوليو بمنطقة الوكالة لمحاربة ركود حركة البيع والشراء للملابس المستعملة، قبل العيد بأيام، فلم يكن أمام «أحمد، ومحمود، ومحمد» سوى الاشتراك فى إحدى شركات الإنترنت للحصول على خدمة الـ«Wi-Fi»، مستغلين هوس الجيل الحديث بوسائل الإنترنت والاتصالات، رافعين شعار «لبسك ومشروبك بفلوسك.. بس الإنترنت علينا». «Wi-Fi For Free» أسفل صورة الرئيس عبدالفتاح السيسى علق الأصدقاء الثلاثة ورقة مطبوعة تحمل عبارة تشير إلى أن تلك المنطقة يتوفر فيها الإنترنت «مجاناً»، نظراً لتوقف حركة البيع والشراء، فبدلاً من «القعدة فى البيت» فكروا ملياً فى طريقة تجذب الزبائن، يتحدث عنها محمود، 22 عاماً، قائلاً «بقالنا هنا 5 سنين، عدت علينا الثورة بهدلت أكل عيشنا، وحكم الإخوان خربها، ودلوقتى ارتفاع الأسعار خلى السوق نايم، فاشتغلنا مع القهوة اللى مأجرين منها الرصيف ودخّلنا إنترنت، وبدل ما الواحد يشرب أو يشترى لبس فى 10 دقائق، الإنترنت يقعّده 3، 4 ساعات فيهم هيشترى وهيشرب شيشة وعصائر واحنا اللى فى الآخر كسبانين». أسباب تعليق العبارة أسفل بوستر الرئيس عبدالفتاح السيسى أسنده محمد سيد، 25 عاما، إلى أن الصورة جاذبة لانتباه المارة باعتباره منقذ ومخلص كافة الباعة وسكان المنطقة من بطش الإخوان: «لما نحط الورقة بتاعتنا تحت الصورة الناس هتيجى تسألنا: هو إيه ده؟ ساعتها بنشرح لهم إنك لو معاك تليفون أندرويد تقدر تشغّل نت ببلاش، واستفدنا أكتر فى موسم كأس العالم رغم إن القهوة بلدى وقديمة وعلى قد حلها لكن كأس العالم شغال واحنا كمان بنبيع والزباين ماكانتش بتمشى».