«فك التكشيرة»: لافتة تدعو للتفاؤل بمشروع القناة
«فك التكشيرة بكرة هيبقى أحلى».. جملة كتبها علاء عبدالعال على ورق كرتون ووقف بها فى ميدان الحصرى بمدينة 6 أكتوبر، داعياً المواطنين إلى التفاؤل بمشروع قناة السويس الثانية باعتباره مشروعاً قومياً سيدر على مصر دخلاً كبيراً.
«حسيت وأنا بكتب الكلمات دى أنها طالعة من قلبى ونفسى أشوف مصر قد الدنيا زى ما قال الرئيس السيسى» قالها الشاب العشرينى، مشيراً إلى أنه وجميع زملائه على استعداد لأن يذهبوا ويشاركوا فى حفر القناة الثانية لسرعة إنجاز المشروع: «طول عمرى كان نفسى فى رئيس شاب يحكم مصر ويعبر بينا للمستقبل والحمد لله بعد أصعب 4 سنين ربنا رزقنا بالسيسى وأكيد ربنا هيكرمنا».
«علاء»، الذى يدرس «طب أسنان» بإحدى الجامعات الخاصة، اختار جملة «فك التكشيرة» من بين جمل عديدة، منها «من جد وجد»، و«سيبها على الله»، و«الصبر مفتاح الفرج»، مضيفاً أن الابتسامة هى مفتاح النجاح وهى جواز المرور للقلوب، حسب وصفه: «ربنا هيرزقنا طالما بنحب بعض وضحكنا فى وش بعض إنما لو فضلنا ننتقد بعض، وكل واحد يفضح عيوب غيره أكيد ربنا مش هيرضى عننا».
واقترح «علاء» فكرة لسرعة حفر القناة وهى الإفراج عن المساجين وقضاء فترة إصلاحهم وتهذيبهم فى حفر القناة الثانية: «عشان يعملوا حاجه فعلا للبلد»، مضيفاً: «السجون مليانة على آخرها لو حصل كده المساجين هايتغيروا فعلاً ويحسوا إن ليهم قيمة وكمان هتتكتب أساميهم فى لوحة شرف يقرأها جميع السجناء».