11 تصريحا لسمير غانم في آخر لقاء تليفزيوني: «عمري ما استغنى عن دلال»
سمير غانم
توفي الفنان سمير غانم، عن عمر ناهز 84 عامًا، بعد صراع مع المرض، بالإضافة إلى إصابته بمرضه، وكان آخر لقاء حواري له قبل رحيله مميزًا، حيث قال فيه إنه يعتبر المسرح بيته الأساسي حتى بعد ظهوره في الكثير من الأعمال الدرامية والفنية المختلفة، ساردا قصة زواجه الأول من سيدة صومالية جميلة وظريفة، «كانت بنت حلال أوي، عيالها أتجوزوا دلوقتي، واتعرفنا على بعض في حفلة وكانت مجنونه بيا، واتجوزنا شهرين ثلاثة».
وأضاف «غانم»، خلال حواره الأخير الذي أجرته معه الإعلامية وفاء الكيلاني، ببرنامج «السيرة»، والمذاع على فضائية «DMC»، أن بناته يحبون شغلهم بشكل غير طبيعي ودائما ما يكونوا قلقين عليه، «أيمي ستايل ودنيا ستايل تاني، ولكن دنيا بتفكر أكتر وأيمي كان الدكتور عايز يشيل اللدغة منها وأنا قولتله أوعي»
أهم تصريحات سمير غانم في لقائه الإعلامي الأخير:
- كنت داخل في التراجيدي ومكنتش بليق فيه.. وطفلة هزقتني بسببه وقالتلي متعملش كدة تاني.
- حمدي الميرغني وعلي ربيع واخدين الاستايل بتاعي، وبحب جدا أوس أوس وأحمد مكي وأحمد حلمي بحس أنه دارس فن وكوميديا.
- دنيا وإيمي بيطلبوني كضيف شرف في الأفلام أو المسلسلات وبروح، وإيمي بالذات علاقتها بيا فظيعة.. فاجأتني بالتمثيل.
- رفضت دور مع الفنان عادل أمام علشان كان مساحتي فيه صغيرة وبعد 20 سنة رجعت عملت معاه فيلم كضيف شرف.. الشخصية الأولي مكنتش عجباني، وهو اللي طلب أني أكون معاه.
- أمي توفت صغيرة كانت في سن الخمسينات.. مش بفتكر تاريخ موتها لأن فيه ذكريات ببعدها علشان مفتركش يوم المآساه.
- لحد دلوقتي عمري ما شوفت طبيخ زي طبيخ أمي الله يرحمها.. أنا نفسي أكل كنافة من اللي كانت بتعملها أمي، ودوخت وشوفت كل المحلات وعمري ما لاقيت حد بيعملها زيها، لحد ما شقطت الفكرة وعملتها وكانت جميلة.
- اترفدت من كلية الشرطة، ولما عرفت أني سقطت جاتلي حالة نفسيه ومرجعتش البيت وفضلت ماشي في الشارع على كوبري الجلاء ومكنتش عارف أنا رايح فين.
- أمي خافت عليا أكون عملت حاجة في نفسي وأبويا نزل يدور عليا ولما روحت محدش قالي كلمة وحشه والكل كان بيواسيني، وأنا مش أهبل علشان أعمل في نفسي حاجة وحشه، بس عدت الحمد لله.
- الضيف أحمد هو اللي لفت نظري في التمثيل وكان وشه لوحده يضحك، وقالي أنت هتشوف المستقبل بتاعك.. استمر.
- أنا خجول وعمري ما عاكست واحده والوحيده اللي وقف وعاكستها كان مديحة كامل وجت مثلت معايا في الجامعة في اسكتش قلبت الدنيا.
- حسيت أن دلال عبدالعزيز لايمكن الاستغناء عنها وأحنا صحاب قبل الجواز، ولما جت قالتلي أنها حامل كان خبر جميل، وهي ماشاء الله عليها ريفية وبنت ناس متواضعه وقمر وكنت بعشق الكاركتر بتاعها وفضلنا مع بعض وكنت أكبر منها بـ20 سنة.
- مكنش نفسي في ولد بعد ما شوفت عيال صحابي بتعمل أيه وخلفة البنات تجنن ودي حكمة ربنا ومكنش في بالي أولادي يشتغلوا في السينما لا أنا ولا دلال وكان حلم أنهم يمثلوا.