الجنيه
صعبان علىَّ حالك يا جنيه
اتبهدلت أوى بعد ما كنت بيه
زمان كنت بتجيب حاجات كتير
قولى النهارده بتشترى انت إيه؟
صعبان علىَّ حالك يا جنيه
* * *
زمان كنت باخدك أنا مهية
وكانت قيمتك إيه اللى هيه
كان شكلك جميل عريض وطويل
كان حجمك كبير أد البطانية
صعبان علىَّ حالك يا جنيه
* * *
زمان كنت بدفع منك الإيجار
وأشترى كمان لحمة م الجزار
وحاجة البيت والسكر والزيت
ده غير كمان الفاكهة والخضار
صعبان علىَّ حالك يا جنيه
* * *
وما كنتش بتكفى ده أنا كنت بالباقى
بشترى هدوم وأدّى اللى مش لاقى
كنت وانت ف إيدى بخاف يا سيدى
لمن كتر مجايبك تفسد أخلاقى
صعبان علىَّ حالك يا جنيه
* * *
والنهارده حالك اتدهور كتير عن زمان
وبقيت فضة ومدور وبقيت غلبان
وضاعت هيبتك واتقلت قيمتك
وبقيت يادوب تجيب زبداية من عند اللبان
* * *
ما بقيتش حتى بتجيب كيلو خضار
والسبعة منك يساووا دولار
ولو اديتك لعيل صغير يكشر ويأير
ويقولى أكيد انت قصدك هزار
صعبان علىَّ حالك يا جنيه
* * *
ياما نفسى يا جنيه من تانى تعلى قيمتك
وزى زمان ترجع بيه وتسترد هيبتك