م الآخر| يوميات موسيليني وعطية "فوففا وسامح والفريك" (16)
فوففا كانت عارفة ومتأكدة إن أنتيمتها كدابة ومحورتية بس بالرغم من كده نفسنة البنات اشتغلت وكان ردها عليها "إيه ده بجد إزاي يعمل كده بجد ده إتجنن! بصي يا عطية نفضيله خالص أصل إيه المناظر البيئة ديهيات (ديهيات! لأ فعلاً موسيليني هو اللي بيئة!) يا بنتي ده أنا سامح...
عطية مسابتش فوففا تكمل كلامها فقاطعتها وسألتها: سامح مين؟
فوففا: سامح يا بنتي اللي حكيت لك عليه.... ساااامح اللي هيموت ويتقدم لي (وسامح طبعًا ذات نفسه ميعرفش إنه هيموت ويتقدم لفوففا، ده مش بعيد أساسًا ميبقاش عارف مين فوففا أصلاً! بس هو لازم البنت وهي بتتكلم مع صحبتها على واحد لازم الشاب يقوم بدور الميت عليها!) وكملت كلامها بالتطويل في "سااااامح" وختمت بيا بنتي "سااااامح بتاع ڤودافون"
عطية: آه آه افتكرته ماله؟
فوففا: أبدًا يا بنتي مفيش بيني وبينه حاجة وبجد بيموووت فيا! ويوم الڤالنتين ده جالي تحت البيت وجايب معاه ورد كتير موووووت وجايبلي معاه "ويتني هيوستن" (اللي ماتت) و"مايكل چاكسون" (المغفور له) وقعدوا يا بنتي يغنوا لي أغنية حماقي بتاعة "أنا جايلك وناويهااااا" وبجد يا بنتي مقولكيش على "ويتني ومايكل" وهما بيغنوا عربي بجد تُحف! ياااي بجد يا عطية أنا كنت مش أعرف (تقديم ال مش على الفعل رمز الرقة عند البنات ورمز السخافة عندي) إنه بيحبني كده!
فوففا سكتت قالت تاخد نفسها من التحوير فلقت عطية بتقولها "هااا وبعدين كملللللي" فقامت فوففا مكملة بـ: "بس يا بنتي بعد ما مايكل وويتني مشيوا لقيت باراشوت كبيييير طاير لونه أحمر وجه ركن (ركن آاه أصلة فزبة!) قدام بلكونتي بظبط وااااو كان مكتوب عليه "آي لاڤ يو فوففتي" وكان جواه الكادوه يا بنتي بجد أحرجني قوي كان جايبلي خاتم دهب أبيض فظيييييع وسلسلة فيها دلاية كبيرة موووووت حاططلي عليها صور شخصيات فيلم "أبو علي" أصلة عارف إني بحب الفيلم ده موووووت، أنا بعدها بجد اتحرجت موووت حسيت إني زبالة لأني مجبتلوش حاجة.. أنا بجد متضايقة أوي من نفسي.
كان رد فعل عطية إنها نهت المكالمة مع فوففا وقالتلها "معلش يا فوففا الموبيل هيقطع شحن" عطية قفلت وهي بتمووت من كتر الغيظ أما صديقة البرنامج فوففا فقفلت وراحت نامت نومًا هادئًا ما هي عملت الواجب وزيادة!
أما سامح.. ساااااامح يا إخوانا نسيتوه؟ سااااامح بتاع البراشوت والمرحوم مايكل اللي بيغني لحماقي! أهو سامح ده كان في الشرقية عند أهله بياكل بط وكِشك وختم بطاجن فريك وآخر معرفتو بمصطلح "ڤلانتين" هي "فلانتين" كافية اللي في أول فيصل! قالك سامح جابلي دلاية عليها كريم ومنى! البنات والحوارات زي الإبرة والفتلة.
عطية طبعًا غارت وماتت واتقهرت وابتدت تلعب في شعرها وتقطع شعراية شعراية وتهز في رجليها وقررت إنها....
يتبع...