دعوة فرح بـ70 جنيهاً: اللى هيدفع راح يدخل.. واللى ما يدفعش يبعد
«لازم نقضى على العادات والتقاليد غير المنصفة للعريس، واللى بتخلى كتير من الشباب مش قادرين يعلموا أفراح بسبب التكلفة المرتفعة، علشان كده فكرت أبدأ بنفسى وأبيع تذكرة الفرح لأصدقائى بـ70 جنيه، اللى عايز ييجى يدفع».. هذه هى الفكرة التى راودت المخرج إمام محمد الحصرى (26 عاماً) من محافظة الإسكندرية، وقرر تنفيذها لتوفير تكلفة الفرح: «أنا زى شباب كتير، لما قرر ياخد خطوة الزواج جمع كل اللى معاه علشان الشقة والعفش، وطالع عينه، وبعدين أتفاجأ بإن علشان أعزم أهلى وصحابى وأعمل فرح فى قاعة لازم أدفع 20 ألف جنيه أو أكتر، علشان بس الناس تيجى وتاكل وتنبسط».
وأضاف «الحصرى»: «فكرت ساعتها أعمل دعوة الفرح بفلوس، 70 جنيه بس.. مش هتفرق مع صحابى وأهلى لكن المبلغ على بعضه يفرق معايا جداً».
الفكرة قوبلت فى البداية بالرفض من أهل كلا العروسين، وقالوا كلاماً من عينة «عيب ومايصحش»، وهو ما اضطر «الحصرى» إلى تطبيقها على أصدقائه من الشباب أولاً لأن الكبار -حسب قوله- لم يستوعبوا الفكرة: «تغيير العادات القديمة أمر صعب لكن إحنا بنحاول علشان الأجيال المقبلة، مش حيقدروا يتجوزوا لو فضلت العادات دى موجودة بينّا، لأن الحياة صعبة جداً، والعيشة بقت صعبة أوى». مضيفاً: «زمان كان الناس بتدى فلوس للعريس تحت بند نقطة، أما دلوقتى محدش بيساعد حد مع إنى لو حد دفع لى فى الفرح تذكرة أنا كمان حادفع فى فرحه».
دعوة الفرح