محافظ الجيزة يزور المدارس فيسأله الأهالى:«الميَّه هتفضل مقطوعة لإمتى؟»
محافظ الجيزة يزور المدارس فيسأله الأهالى: «هى الميَّه هتفضل مقطوعة لحد إمتى؟»
سيدة تشكو لمحافظ الجيزة انقطاع المياه أثناء جولته
على طريقة «تيجى تصيده يصيدك»، تجوَّل الدكتور خالد زكريا العادلى، محافظ الجيزة، فى المدارس، بغرض الاطلاع على استعدادات العام الدراسى الذى بدأ أمس، فأوقعه الحظ فى أيدى أولياء أمور.
«العادلى» مبرراً: «دى بتقطع عندنا فى ديوان المحافظة»
تصور المحافظ أن يستمع لأسئلتهم حول الدراسة أو الاستفسار عن الإجازات، لكنهم صدموه بالسؤال الذى لم يملوا تكراره، ولم يكفّ هو عن سماعه طوال الأسابيع الماضية «هى الميَّه هتفضل مقطوعة لحد إمتى؟، إنت مش حاسس بينا ولا عمرك تستحمل اللى إحنا شايفينه»، فما كان من المحافظ إلا توجيه الرد المعتاد: «أنا عارف والله والموضوع هيتحل قريب».
لم ينتهِ الأمر عند الإجابة الدبلوماسية، واصل ذوو الطلاب شكاواهم، وقالت إحداهن: «إحنا اتبهدلنا فى العيد ما عرفناش ندبح، وكل شوية تصريحات من وزارة الرى، والمحافظة منسوب النيل قلّ ومنسوب النيل زاد، وإحنا متعلمين ومعانا بكالوريوس وحضرتك انت المسئول تقعد مع المسئولين فى وزارة الرى أو وزارة الزراعة وتحلوا المشكلة»، ليبرر المحافظ: «إحنا والله بتقطع عندنا الميَّه فى ديوان المحافظة»، فردت: «بس بتجيبوا ميَّه معدنية» ما أثار ضحك الحضور.
الأزمة نفسها واجهت «العادلى» فى كل جولاته على المدارس، التى صاحبته فيها بثينة كشك، وكيل وزارة التربية والتعليم بالمحافظة، للوقوف على مستوى المدارس وحالها فى أول أيام الدراسة، والتأكد من إتمام عمليات الصيانة والمتابعة الدورية.