مبادرة فنية لإسعاد المواطنين: «ارسمنى شكراً»
مبادرة فنية لإسعاد المواطنين: «ارسمنى شكراً»
أحدى بورتريهات مبادرة ارسمنى شكراً
«يلا هنرسم مصر كلها.. كل اللى عليك الصورة، والبورتريه علينا». هكذا قرر أربعة رسامين إطلاق مبادرة بعنوان «ارسمنى شكراً»، لتكون أول خدمة من نوعها تتيح للمواطن «الرسم عن بُعد». تفاعُل المواطنين مع خدمة «ارسمنى شكراً» منذ الوهلة الأولى لإطلاقها على مواقع التواصل الاجتماعى، دفع إسلام خالد وزملائه بالمبادرة إلى المكوث على مدار اليوم لتلقى صور المواطنين: «بما إن الخدمة إلكترونية كل اللى هيعمله المواطن إنه هيعمل لايك وشير للصفحة ويبعت الصورة، وإحنا هنرسمها وكل اللى عليه ييجى يستلمها وكل ده من غير ولا جنيه»، قالها إسلام خالد، أحد المشاركين بالمبادرة. إسعاد المواطنين وإدخال البهجة إلى نفوسهم، كان الهدف من وراء المبادرة، حسب «إسلام»، مشيراً إلى أن الشباب كان الأكثر طلباً وتفاعلاً مع الخدمة عن بقية الفئات العمرية، وأن بعض كبار السن حرصوا على ألا تظهر تجاعيد وجوههم فى «البورتريه» ليظهروا أصغر سناً: «لما عملنا كورسات للرسم قبل المبادرة كانت الفئة اللى بتتردد علينا من سن 4 لـ45 وشفنا فى عينيهم فرحة بجد فقررنا نفرّح مصر كلها». مبادرة «ارسمنى شكراً» لم تكن الوحيدة التى حرص عليها الشاب العشرينى وزملاؤه، بل قام بضم عدد من الفنانين والمهندسين، لإعطاء كورسات فى الرسم والعمارة والتمثيل: «الفنانين اللى معانا أغلبهم طلبة فى جامعات بس مبدعين، وعشان كده مش هتقف المبادرة على أهالى القاهرة بس، هنعلن عنها فى المحافظات وهنتعرف على ملامح جديدة للمصريين، ويمكن بعدها نعمل معرض فيه وشوش المصريين».