دا شيء عادي
ومتعود عليه دايمًا
ومؤمن إن أنا مؤمن
بإنّي حصان
ما يكسرهوش عَدد وعتاد
ولا يهزوش وجع أو جوع
ولا يهمّوش شقا وإجهاد
ولا يرجعش عن فكرة
بلادي على الخريطه بلاد
وقلبي اللي اترسم ع الحيط
ـ عشان خاطرك "نشيد إنشاد" ـ
وضلعيني اللي ضمّينك
تقاوي ولاد
لذلك بطّلي مناهدة
وكوني منصفة وشاهدة
في حربي الباردة ع الخاين
وع الطرطور
وع القوّاد دا شيء عادي
ومتعود عليه دايمًا
ومؤمن إن أوجاعك
نتيجة ذلّ واستعباد