ريهام عادل رشدي ريهام عادل رشدي مصر عروس العالم 2017
الخميس 09-03-2017 | PM 05:31

متستغربوش من العنوان، أيوة مصر اتقرأت فاتحتها وبقت عروسة وأنا في المقال ده ببارك وبهنيء المصريين وبشاركهم الفرحة اللي تعتبر إنجاز كبير جدا في أول شهور السنة.

مش هنكر إننا كمصريين مرينا بفترات كتير صعبة، أوقات حزينة وأزمات مش عايزة اتكلم فيها كتير لأنه مقال للتهنئة والإحساس بالفخر.

طبعا من أول الإنجازات اللي حصلت كانت زيارة نجم الكرة العالمي الأرجنتيني Lionel Messi لمصر، و كان هدف الزيارة هو أن شركة من شركات الأدوية المصرية قامت بحملة "معا للقضاء على فيروس الكبد الوبائي سي"، وهدف الحملة هو توفير العلاج للمصريين وغير المصريين بهدف القضاء على الفيروس سي نهائيا واختارت واستضافت ميسي للإعلان عن الحملة، ووصل ميسي مصر واختار فور وصوله زيارة منطقة أهرامات الجيزة وطبعا صورة مع الأهرامات واللي نشرها على كل صفحات مواقع التواصل الاجتماعي الخاصة به كانت بمثابة إعلان رسمي للعالم بأن مصر هي بلد الأمن والأمان رغم كل الصعوبات والظروف اللي مرت بها.

وطبعا الصورة ديه شجعت نجوم كتير على التعبير عن رغبتهم بزيارة مصر قريبا ومنهم النجم Ronaldo الذي تم الإعلان عن رغبته بزيارة مصر خلال الشهور المقبلة و لكن لم يُحدد التاريخ بعد.

بس النجم السينمائي العالمي will smith لم ينتظر الكثير واصطحب أسرته في زيارة غير رسمية لمصر وفوجئ المصريين بالزيارة وصورة مع الأهرامات وأبو هول والمتاحف واللي انتشرت بسرعة على جميع مواقع التواصل الاجتماعي، و بصراحة المصريين كلهم حسوا بالفرحة الواضحة على وَيْل سميث في كل الصور والفيديوهات.

 

ومن المتوقع زيارة المزيد من النجوم العالمية لمصر في الفترة المقبلة.

طبعا الفرحة موقفتش لحد كدة فمن الأحداث اللي بتعتبر إنجاز في مصر خلال هذه الفترة هي افتتاح مول مصر Mall of Egypt في مدينة 6 أكتوبر وهو بيعتبر من أكبر وأحدث المولات التجارية في مصر حاليا.

توكيلات تجارية عالمية كتير هيتم افتتاحها داخل المول إلى جانب افتتاح ski Egypt وهي مدينة الجليد اللي تعتبر شيء جديد وممتع للمصريين من بعد غلق snow city.

طبعا مليانة أدوات التزحلق على الجليد وألعاب الجليد المختلفة وطبعا الفرحة والتشويق زادوا لما تم تداول أخبار غير مؤكدة عن وجود البطاريق قريبا.

طبعا نجاح عظيم لمصر خصوصا في بداية العام، و لازم نقول ونفرح ونفتكر دائما قول الله تعالى "إن مع العسر يسرا" صدق الله العظيمتفاءلوا يا مصريين.. نجوم عالميين بيزورا بلدكوا، ومشاريع عالمية بقت على أرض مصرية، ومتفلقوش لو مجاش البطريق، بس مصر بقت على أول الطريق.

مقالات متعلقه بالكاتب

تعليقات الفيس بوك

الأكثر قراءة

عاجل