"مش فارقة".. برنامج "تامر" و"سامية" لإيصال صوت مرضى ضمور العضلات
صورة تامر
في هدوء تام، وتركيز عالٍ، يستعد كلًا من تامر حيدر وسامية العشماوي الشهيرة بـ"زهرة الدلتا"، لتقديم حلقات برنامجهم "مش فارقة" المخصص لعرض مشاكل مرضى ضمور العضلات ومتضمنًا باقي الإعاقات الأخرى، متخذين إحدى غرف منازلهم مقرًا لانطلاق البرنامج.
واستقر تامر، المريض بضمور العضلات، على إطلاق البرنامج الذي يبث من خلال الإنترنت، متوليًا أمور مونتاج الحلقات التي ينادي من خلالها بالإحساس بمعاناة ذوي الاحتياجات الخاصة الذين ينقصهم الكثير من الإمكانيات للعيش بكرامة وآدامية.
"أول حلقة كانت بتتكلم عن مرضى ضمور العضلات اللي احنا من ضمنهم، وغنيت أغاني بتعبر عن حقنا في الحياة لكن مافيش فايدة، ولحد دلوقتي ملهمش تعداد حقيقي في الدولة، وتاني حلقة كانت عن أصحاب الإعاقات في العموم وطريقة التعاملات المهينة اللي بيتعرضولها"، بهذه الكلمات سرد تامر السبب الحقيقي وراء إنتاج البرنامج.
بشكل متعاون يستقبل تامر، الذي يعيش في محافظة سوهاج، الفيديوهات التي ترسل من قبل زميلته في تقديم البرنامج التي تسكن مدينة طنطا: "المسافات مش بتعمل مشكلة كل حاجة دلوقتي بتخلص من خلال الإنترنت، بتنفق على فكرة الحلقة وتصويرها من خلال التلفيون، بعد كدا بجمعهم واعمل لهم مونتاج، واخترت أسم مش فارقة عشان فعلا مش فارق معانا غير إننا نوصل صوتنا والمسئولين تحقق مطالبنا".
بكتابة بعض الأغاني واستخدام موهبة تقديم البرامج تقتصر مشاركة سامية، في البرنامج الذي يعرض كل يوم جمعة، والتي لم تستطع استكمال تعليمها لظروفها المرضية، التي حكمت عليها البقاء في المنزل: "من زمان عندي موهبة تقديم البرامج، عشان كدا استغلتها في نشر حقوق الشخص المعاق والتعامل معاه بشكل لائق، والأهل قبل الناس اللي في الشارع لازم يعرفوا أن من حقنا الجواز والمشي في الشارع بشكل مريح ويبقى في إمكانيات تسهل علينا ده، مش مجرد شخص محتاج مساعدة والناس تمن عليه"، بحسب سامية.