تاجر يقدم الخضار والفاكهة مجاناً لمرضى السرطان
توفي صديقه بمرض السرطان اللعين، وانتصر الخبيث مؤخراً على صاحبه ورحل بعد صراع شديد مع المرض، ليترك في قلب صديقه «أنتيمه» مرارة الفقد وقسوتها، فقرر الثاني أن يعرض بضاعته من الخضار والفاكهة مجاناً للمحتاجين والمرضى، وعلى وجه الخصوص أصحاب مرضى السرطان كصدقة جارية على روح صديقه.
جمعة مختار من أبناء محافظة الفيوم، يعمل تاجر خضار وفاكهة بمنطقة الهرم، وقرر منذ سنة وشهرين تقديم الفواكه والخضروات بالمجان أمام الفقراء والمرضى خاصة مرضى السرطان: «سألوني ليه المرضى وده عشان مرض السرطان اللعين أخد مني صاحبي وعشرة عمري ومات بسببه وقلت ايه اللي ينفع صاحبي بعد الموت فقررت إني أقدم الخضار والفاكهة بالمجان للمرضى كثواب وصدقة يعني لروح صاحبي وأخويا اللي مات».
ويحكي «جمعة» في لايف خاص لـ «الوطن»، أن صديقه عانى كثيراً من مرض السرطان: «صاحبي مكنش بيدوق طعم النوم وعلى طول كان تعبان وقعد سنين بيتعالج من السرطان وكان بينهش في جسمه وبياكل فيه وتعب قوي معه وكان بيصعب عليا إني مش عارف أعمل له أي حاجة عشان كده عملت له الصدقة دي وربنا يقبلها مني يا رب على روح صاحبي».
ويقول «جمعة» إن الفاكهة المجانية يقدمها لأي عابر سبيل يطلبها منه: «اللي بيتاجر مع ربنا ده بيكون كسبان ورزقي ورزق الناس دي على الله» ووفقاً إلى «جمعة» يحرص على بيع الخضروات والفاكهة بأسعار متوسطة تناسب كافة الفئات: «والله الأسعار دي يوم فوق ويوم تحت وكله على الله المهم الناس كلها تأكل الفاكهة لأنها مغذية ومقوية للمناعة خصوصاً في وقت زي ده جائحة كورونا وربنا يعدينا منها على خير».
تعليقات الفيسبوك