«الكيس بدل التلويث».. مشروع تخرج بدل «الكلام على ورق»
«إرمى فى الكيس بدل التلويث»، تحت هذا الشعار بدأت «داليا» وفريقها، من طلبة الفرقة الرابعة بكلية الآداب قسم إعلام جامعة حلوان، رحلتهم لتنفيذ مشروع التخرج بصورة جديدة وإيجابية تفيد المجتمع أكثر من «الكلام اللى على ورق»، تقول «داليا»: «فكّرنا إننا نعمل حاجة جديدة ومفيدة، وركزنا على موضوع واحد، وهو حل أزمة التلوث، وأجرينا زيارات مصورة لمدارس كثيرة، وسيتم تجميع تلك الزيارات فى المجلة التى نعدها».
أكياس بلاستيكية، صناديق قمامة مزينة.. أشياء بسيطة اختارتها «داليا» وفريقها فى الزيارات التى أجروها لعدة مدارس للقاء التلاميذ والحديث إليهم وحثهم على تصحيح عاداتهم، وتصوير تلك اللقاءات لضمها إلى مجلتهم المصورة المنتظرة، أضافت «داليا»: «مش لازم تكون المجلة عبارة عن كلام مكتوب، وموضوعات مختلفة، إحنا اخترنا موضوع واحد مفيد للمجتمع، وقررنا نشره فى هيئة صور عن الزيارات اللى بنعملها»، موضحة: «المفروض إن الفرقة كلها متقسمة على 6 مجموعات، وكل مجموعة اختارت فكرة إعلامية لمشروع التخرج، واحنا اخترنا ننزل بنفسنا علشان نغير حاجة سلبية بالصوت والصورة، ويبقى مشروعنا مجلة تضم صوراً للإيجابيات اللى أنجزناها».
العادات السيئة، وأبرزها إلقاء المخلفات فى الشارع، كانت الدافع لفريق «داليا» لاختيار الفكرة، وتضيف الطالبة بقسم الإعلام: «قررنا نبدأ بالمدارس ونحط لكل فصل صندوق قمامة، وزيّنا الصناديق بنفسنا علشان نشجعهم يرموا فيها، ووزعنا أكياس بلاستيك تبقى فى شنطة كل طفل علشان لو فى الشارع ممكن يحط فيها أى حاجة لحد ما يروح البيت بدل ما يرمى فى الشارع».
«زيارتنا لمدرسة مابتبقاش مرة واحدة، بنزورها أكتر من مرة عشان نتابع الإيجابيات ومدى التزام الأطفال واستجابتهم للفكرة»، وتابعت «داليا» أن فريقها تأكد من نجاح الفكرة بتكرار الزيارة إلى 3 مدارس: «الأطفال مابقوش يشيلوا الكيس الفاضى من شنطتهم علشان يرموا فيه الزبالة بتاعة اليوم.. الكيس هو الحل».