ربات بيوت يحاربن الغلاء بـ«ياميش بيتى»: أوفر وأطعم
«قمر الدين، زبيب، قراصيا، مشمشية».. سلع رمضانية لا يخلو منها أى بيت مصرى فى شهر الصوم، يسبقه بأسبوع خروج ربات البيوت إلى المحال لشراء «ياميش» رمضان بأسعار متفاوتة، إلا أن «هناء» و«عايدة» قررتا محاربة غلاء أسعار «الياميش» بـ«ياميش بيتى»، إذ تختار كل منهما يومياً نوعاً من السلع الرمضانية، وتنشران مكوناتها ووصفتها البيتى على موقع التواصل «فيس بوك»، بتكلفة أقل من سعرها فى المحال وبجودة أفضل، تحت شعار «وصفة تلمنى ولا أسعار تذلنى».
شكاوى بعض السيدات على مواقع التواصل من ارتفاع أسعار منتجات رمضان بطريقة جنونية رغم قلة الجودة، دفعت الصديقتين إلى فكرة توفير وصفات «الياميش» لربات البيوت على «فيس بوك»، حسب هناء الشهاوى، ربة منزل: «اعتبرت أنى باعمل خير فى رمضان بأقل مجهود ووقت، لأن المفروض اللى عنده معلومة أو حل لمشكلة يبادر بالطرح، عشان كده اتفقت مع (عايدة) صاحبتى بعد ما لاقينا أسعار ياميش رمضان غالية جداً وفيه ناس كاتبين أنهم مش قادرين يشتروا حاجات رمضان، فكرنا نكتب ليهم وصفات ونوفر لهم، زى ما وفرنا فى بيوتنا وقضينا رمضان السنة دى بياميش بيتى من غير ما نشتريه بالغالى».
«هناء» خصّصت نصف ساعة يومياً لكتابة وصفة وطريقة تحضير نوع من الياميش، والرد على التعليقات والأسئلة التى تأتيها على الوصفة: «مالناش صفحة محددة، بنحاول نبعت فى الجروبات والصفحات اللى على (فيس بوك) عشان نوصل لأكبر عدد من ربات البيوت فى المحافظات والكل يستفيد، والوقت اللى باقعده على النت هو اللى خصصته فى شهر رمضان لأنى أفيد الناس بوصفات يعملوها بأقل تكلفة».
بدأت «هناء» و«عايدة»، بنشر وصفة قمر الدين لعمله فى المنزل، بعد أن تراوح سعره فى المحال بين 30 و50 جنيهاً: «الحجم الكبير مابيتكلفش عمايله فى البيت 15 جنيه، ولفة قمر الدين الصغيرة بـ10 جنيهات، كل الحكاية أننا بنعمله زى المربى بالظبط بس بنفرده على ورق سوليفان فى الثلاجة فيطلع قمر الدين، وأحسن من اللى بيتباع بره كمان»، مضيفة: «بدأنا فى نشر الوصفات من أول يوم رمضان وهننتهى منها آخر الأسبوع عشان الناس تلحق تعمل المشمشية والقراصيا والزبيب والحاجات المهمة قبل رمضان ما يخلص، لأن الناس متجاوبة معانا وبيستنونا كل يوم ننزل وصفة جديدة، واللى ماقدرش يشترى بالغالى يلحق يعمله فى البيت».