«تويتر» تعليقاً على عودة الأزمة: كنت لسه هكتب أن «قنديل» أفضل رئيس وزراء.. النور قطع

«النور قاطع» كان الهاشتاج الأكثر انتشاراً على موقع تويتر، الذى شهد عددا كبيرا من التعليقات الساخرة، التى ربطت بين نتيجة الاستفتاء على مسودة الدستور وتحقيق الاستقرار وعودة قطع التيار الكهربى، ولم يغفل المعلقون ربط ارتفاع أسعار الكهرباء واستمرار قطع التيار عن المنازل، وتبادل الرواد التعليقات الساخرة مثل «الاستقرار حلو مافيش كلام.. النور قاطع» فى إشارة إلى الإيفيه الشهير لمحمود عبدالعزيز فى فيلم «إبراهيم الأبيض»، «ربنا يستر والرئيس ما ياخدش قرارات فى الضلمة»، «يارب اللى لسه النور ما قطعش عندهم يقطع عشان يحس بالنهضة والاستقرار»، هكذا تضمنت تعليقات مواقع التواصل الاجتماعى على عودة قطع التيار الكهربى فى عدد من المحافظات لأول مرة خلال فصل الشتاء، من التعليقات «لسه كنت هكتب تويتة وأقول إن هشام قنديل أفضل رئيس وزراء فى تاريخ مصر راح النور قاطع»، «بس مرسى قاطع النور فى ليلة مقمرة عشان يعودنا على الرومانسية والشعب يحب بعضه»، «النور بقاله ساعتين قاطع.. بركات الدستور والاستقرار»، و«فعلا يا مرسى عجلة الاستقرار دارت بعد الاستفتاء عشان كدا النور كان قاطع إمبارح ساعتين والنهارده من الساعة واحدة لحد دلوقتى»، «جاى البيت أستريح راح النور قاطع بقاله أكتر من ساعة.. أنا تعبت من مشروع النهضة أوى كفاية»، «بعت ابنى يجيب شمع من محل صاحبه سلفى قاله هات لى دستة استقرار عشان النهضة جت».