«الكهرباء» تستعد لـ«رمضان» ببوستر «احسب فاتورتك»
بوستر «احسب فاتورتك»
«قبل الهنا بسنة».. مثل شعبى دارج يصف استعداد مرفق الكهرباء لاستقبال شهر رمضان المقبل، وقرر المرفق استباق الشكاوى السنوية المعتادة حول تراجع الخدمة خلال الشهر الفضيل، ليس من خلال حملة تليفزيونية كالمعتاد، بل ببوسترات ومطبوعات يتم توزيعها على المواطنين فى الشوارع وعبر المحصّلين، تخاطب المستهلك: «استمتع بالشهر الكريم وماتخليش حاجة تفاجئك.. احسب وتابع عدادك»، وذلك قبل شهرين من حلول الشهر الفضيل.
«قبل الهنا بشهرين».. تطبيق لحساب الاستهلاك يومياً
تشرح المطوية آلية جديدة تتيحها وزارة الكهرباء للمستخدمين، عبر تطبيق يسمح للمستهلك بحساب الاستهلاك والفاتورة الشهرية، والتحكم فيها من خلال توضيح الأسعار الجديدة للكهرباء، واحتمالات تخفيف الأحمال خلال شهور الصيف، لم يصدق حسين محمد، محاسب، نفسه وهو يتسلم المطوية، وزعها عليه أحدهم وهو فى طريقه إلى عمله بحلوان، ما أثار اندهاشه: «الوزارة بتستعد لشهر رمضان قبل ما ييجى بشهرين.. مصر اتغيرت يا جدعان».
قرأ «حسين» البوستر بعناية، وتتبع كل الخطوات الواردة فيه، عازماً على الاستفادة من الخدمة التى تقدمها الوزارة: «اتبعت الخطوات بكتابة آخر قراءة للعداد من فاتورة الشهر اللى فات، وكتابة قراءة العداد فى الوقت اللى باستعلم فيه، وباحسب استهلاكى قد إيه كل شوية، وكل ده ماأخدش منى دقايق، وكويس إنه اتطبق قبل رمضان عشان أتابع استهلاكى بنفسى».
«برنامج احسب فاتورتك لمعرفة فاتورة الكهرباء والمتابعة، يساعد المواطن على ترشيد استهلاكه، والحد من الشكاوى، لذلك قررنا إضافة تطبيق متابعة استهلاك المواطن مع اقتراب شهر رمضان»، قالها حجازى مصطفى، مسئول عن تلقى شكاوى فواتير الاستهلاك بشركة توزيع كهرباء شمال القاهرة، وأضاف: «التطبيق موجود منذ فترة، لكن متابعة الاستهلاك جديدة، وهدفنا عمل ملصق عشان نوعّى المواطنين قبل شهر رمضان، ونخلص من المشاكل».