مطعم الغلابة: الوجبة بـ«5 جنيه»

10:55 م | الأربعاء 30 مارس 2016

على أعتاب أحد المطاعم القديمة بمنطقة حى الأزبكية وتحديداً شارع كلوت بك، يقف مصطفى محمد، واضعاً رأسه على راحة يده وينظر فى الأرض وكأنه ينتظر الفرج، داخل مطعمه الصغير يضع الرجل الخمسينى أوانى الطهى الكبيرة على النار، ليعد فيها الفراخ واللحم والخضار بكل أنواعه منتظراً زبائنه الذين ربما لا يأتون.

لم ييأس «مصطفى» من اختفاء زبائن مطعمه الشهير فى أوساط البسطاء، فقد ورثه عن أبيه ويعمل به منذ نعومة أظافره، رغم عمله الآخر بأحد المطابع، يحرص الرجل على طهى الطعام وتنظيف المطعم ثم يقف فى الخارج علّه يجد أحداً ممن قادتهم أقدامهم للمرور أمام المطعم: «المحل ده قديم أوى، كان بتاع أبويا، ورغم إنه مش شغال زى زمان إلا إنى مستحيل أقفله، وأتمنى ولادى مايقفلوهوش من بعدى ويكملوا اللى عمله أبويا حتى لو مفيش زباين زى الأول».

وجبة كاملة تحتوى على خضار وأرز وقطعة لحم أو فراخ بـ5 جنيهات، وأخرى كاملة بدون لحوم بـ4 جنيهات، هكذا احتفظ «مصطفى» بقائمة أسعار الوجبات القديمة على واجهة المطعم، رغم ارتفاع أسعار كل شىء حوله، فهو يرى أن المواطن ليس له ذنب فى جنون الأسعار والتلاعب بلقمة عيشه: «أنا بطبخ بنفسى كل الأكل مفيش حد بيساعدنى ومعنديش صبيان، ربنا بس يبعت الزباين، أنا ربيت منه اتنين واحد فى أولى جامعة والتانى فى أولى ثانوى والحمد لله».