هاشتاج شعبي لمساندة متضرري الرويعي #يلا_نشتري_من_العتبة

04:39 م | الخميس 12 مايو 2016

دشن نشطاء عبر مواقع التواصل الاجتماعى هاشتاج "يلا نشتري من العتبة" لمساعدة المتضررين من الحريق الذي نشب في الرويعى صباح الاثنين الماضي، وأسفر عن خسائر فادحة لأصحاب المحلات التجارية.

قال أحمد الفقي أحد المساهمين في الحملة "لكل اللي عاوز يساعد بجد ينزل يشتري من العتبة عشان نعيد تشغيل العتبة من جديد، إحنا بدأنا نفرش ونصلح تاني بالفعل بس أيد لوحدها ماتصقفش فمحتاجين الكل يشارك ويساعد بالنزول إلى العتبة ومساعدة الباعة الجائلين والمحلات في إعادة بناء وتشغيل العتبة مرة تانية".

وأضاف "إحنا مش محتاجين مساعدات مادية إحنا محتاجين مساعدات معنويا زي نزولكم لتعديم حملة "يلا نشتري من العتبة"، وادعم إبن بلدك لإعادة تشغيل العتبة مرة تانية، فيه شباب كتير بتساعد بنشر الصور واللي حصل بس ده مش كفاية، مساعدتك للمتضررين هي أنك تنزل تشتري عشان المكان يعمر ويشتغل تاني".

وناشد أحد النشطاء، ويدعى أحمد الهواري، المواطنين قائلا "يا جماعة اللي عاوز يساعد الباعة الجائلين في العتبة ينزل هو وأسرته أو أصدقائه ويشتري، عشان بكدا يبقي انتوا بتساعدونا بعض من غير فكرة أنكم تلموا فلوس أو تنضفوا أو تيجوا بأكل زي ما ناس عملت إمبارح، كان بصراحة منظر بجد لا يدل على المساعدة بل يدل على عرض النفس والتصوير وقول أنا موجود في العتبة مع أخذ بعض الصور السلفي".

وروت آمال حسن استغاثات وروايات شهود العيان لتحفيز المواطنين على النزول ومساندة الآهالى، "لو شفتم صورة الرعب والخوف على وجوههم لكن نازلين يشتغلوا وبيجروا على رزقهم ورغم كل شئ جواهم قوة مش عارفة جايبنها منين، يمكن من الأزمات وراء أزمات اللى إحنا فيها".

وقالت شيرين عبده "أكيد فيه ناس معندهاش مكان تبات فيه بسبب الحريق اللي حصل فى العتبه إمبارح، حاول تتبرع بأي شى للناس دي وتقف جنبهم، بطاطين أكل أو حتى بالمساهمة المعنوية، كان ممكن لقدر الله تكون مكانهم، حاول تساعدهم بأى شىء".