مستفيدون من العلاج: «حسنة الحكومة الوحيدة للغلابة»

07:27 م | السبت 14 مايو 2016

بجسد هزيل أنهكه المرض وعيون غائرة فى وجهه الشاحب، يعيش محمود عبدالفتاح الدويك، وسط بناته الثلاث وزوجته فى بيته الكائن فى منطقة الساحل بشبرا الخيمة، بعد أن أجرى عملية قلب مفتوح قبل 15 يوماً فى مستشفى معهد ناصر على نفقة الدولة.

حكى «الدويك» لـ«الوطن»، قصته مع رحلة المرض والعلاج: «لولا العلاج على نفقة الدولة كان زمانى مُت والكلاب أكلتنى، العلاج على نفقة الدولة هو الحسنة والوحيدة اللى بتقدمها الدولة للمواطنين فى مجال الصحة بشكل عام».

{long_qoute_1}

قال الرجل الستينى: «تعبت من حوالى 8 سنين وجتلى جلطة ودخلت الرعاية المركزة على حسابى، وصرفت فلوس كتير جداً، والحمد لله خفيت بعدها وبقيت أحسن، بعد كده تعبت تانى ورجعت المستشفى وبدأت أتعالج على حسابى لكن العلاج كان مكلف جداً، وكنت بدفع كل أسبوع 600 جنيه روشتات، وسبت العلاج لأنى ماكنتش قادر أستمر فى شراء الأدوية على حسابى».

أضاف: «رُحت مستشفى قصر العينى والدكتور عمل لى قسطرة وخفيت بعدها، لكنى تعبت تانى لغاية لما جه دكتور اسمه شريف مختار، وقال لى إنت لازم تعمل عملية لأن عندك قصور فى الشريان التاجى بنسبة 70% وفيه شريانين تانيين فيهم قصور واحد بنسبة 30% وآخر بنسبة 40%، والعلاج الوحيد هو إجراء عملية قلب مفتوح».

تابع «الدويك»: «طبعاً العملية دى علشان أعملها على حسابى هتتكلف أكتر من 100 ألف جنيه، وعمرى ما كنت هقدر أعملها على حسابى، فقررت إنى أقدم طلب للحصول على قرار علاج على نفقة الدولة، وبالفعل الإجراءات مشيت سريعة جداً الحمد لله، والدكتور اللى أنا متابع معاه ساهم فى سرعة إنهائها والحصول على قرار العلاج، علشان هو أكتر حد كان عارف حالتى، لكن أنا عملت التحاليل والأشعة واشتريت الدم على حسابى، والتحليل لوحدها كلفتنى 1800 جنيه تقريباً، واشتريت صفائح الدم وكرات دم بيضاء وحمراء بحوالى 2000 جنيه، هو ده اللى أنا دفعته فى العملية والباقى كان على حساب الدولة، والحمد لله بقيت كويس دلوقت».

استطرد الرجل: «فيه دكاترة وموظفين وممرضين كتير ولاد حلال وطيبين وبيساعدوا الناس فعلاً، لكن الحسنة تخص والسيئة تعم، وزى ما فيه ولاد حلال، فيه كتير وحشين جداً، أنا بقول كده علشان أنا اتنصب عليا فى مستشفى معهد ناصر، فيه موظف هناك بينصب على كل العيانين والغريب إنه لسه بيشتغل ومفيش حد أخد ضده موقف، فعندما حدد الدكتور يوم العملية، رحت بنك الدم أشترى دم لقيت الموظف ده بيقول لى إنه ممكن يجيب لى ناس تتبرع بالدم مقابل إنى أدفع له 1200 جنيه، ولما قُلت له مش معايا غير 600 جنيه، قال لى هاتهم، ويوم العملية هتلاقى الدم جاهز وتدخل على طول، الموظف إدانى ورقة مختومة بختم بنك الدم فى المستشفى موجود فيها أسماء 8 أشخاص وأرقام بطايقهم الشخصية، والغريب إنى لما دخلت غرفة العمليات قدمت الجواب اللى معايا، فالدكتور قال لى إن الجواب ده مُزور ومش صحيح، وفى بعض الممرضين قالوا إن العملية هتتأجل علشان مفيش دم جاهز، طبعاً أولادى وقرايبى اتبرعوا لى بالدم والدكتور قرر إنه يعمل العملية، وقدمت محضر لمدير المستشفى فى الموظف، لكن لغاية دلوقت مفيش أى نتيجة ولسه الموظف بينصب على الناس عادى، وقالوا فى المستشفى إنه بيتحقق معاه». أكد «الدويك» أنه الآن أفضل كثيراً بعد أن أجرى العملية الجراحية على نفقة الدولة، لكن لا بد من تطهير وزارة الصحة من المرتشين والنصابين الذين يتاجرون بآلام المرضى.

أمام مستشفى معهد ناصر، وقفت خيرات رمضان، فى انتظار قرار العلاج على نفقة الدولة لتركيب دعامتين لشرايين القلب، قالت: «العلاج على نفقة الدولة طوق النجاة للفقراء، قدمت الأوراق اللازمة للقرار منذ شهرين تقريباً، بعد أن أكد الأطباء لى ضرورة إجراء جراحة وتركيب دعامتين، وكان المقرر قبل إجرائها عمل رسم قلب بالمجهود الدوائى، لكن تم تأجيله لأنى مريضة بالسكر، ولا بد من طبيب متخصص فى السكر يؤهلنى للجراحة، قبل تركيب الدعامتين».

أضافت: «معنديش تأمين صحى علشان كدا كنت لازم أعمل العملية على نفقة الدولة، وقدمت كل الأوراق المطلوبة والأطباء الاستشاريون أكدوا ضرورة إجرائها فى أسرع وقت، وهو ما كان سبباً فى إن الإجراءات تمت بسرعة، وتم تأجيل موعد الجراحة مرتين، لحين توفر الدعامات».

وتابعت: «كل يوم أروح المستشفى علشان أعرف ميعاد العملية، الموظفين يقولوا لى ابقى اتصلى علينا، المستشفيات مليانة ناس مريضة وعمرها ما هتقدر تتعالج غير على حساب الدولة، ولازم الحكومة تبص على الناس دى شوية وتساعدهم بسرعة، لأن بعضهم بيموت لأنه ممعهوش تمن العلاج، ولولا إنى لقيت حد يساعدنى ويطلع لى قرار العلاج، كنت زمانى دايخة على المستشفيات الخاصة علشان أعمل العملية».