بالفيديو| دومة خلال محاكمته بـ"الاعتداء على الشرطة": "دي أهم قضية"
دومة خلال محاكمته بـ"الاعتداء على الشرطة": "دي أهم قضية"
تحدث الناشط السياسي أحمد دومة مدافعًا عن نفسه، اليوم، خلال نظر قضية اتهامه بالتعدي على ضباط شرطة، موضحًا أنه على الرغم من الحكم عليه بـ31 سنة في قضايا أخرى، والحكم عليه بـ6 شهور فقط في تلك القضية إلا أنه يعتبرها أهم قضية بالنسلبة له، مستطردًا بقوله: "الـ6 شهور مهماش الحاجة اللي هتدمر مستقبلي مع كل الاحترام والتقدير، لكن على الرغم أنهم 6 شهور قياسا بالـ31 سنة بالنسبالي هما أهم قضية من اللي أنا أخدت فيها أحكام ومؤبد وحاجات شبه كدة".
وأوضح دومة، سبب أهمية تلك القضية المنظورة بالنسبة له، قائلًا: "السبب بسيط ربما يكون متعلق بينا احنا التلاتة أو على الأقل متعلق بيا أنا شخصيًا، السبب ده هو إنه احنا قدام حاجة من 2، الهيئة الموقرة أنا بطلب منها أو بأكد على أهمية إنها تبقى مدركة أهمية القضية دي للسبب اللي هقوله، إن القضية دي أما أن ترسخ لجريمة مستمرة ويومية ترتكبها الداخلية باختلاف قطاعاتها في حق المتهمين باختلاف انتماءتهم سواء سياسي أو جنائي أو غيره في إن المتهمين دول شوية كلاب مش من حقهم يطلبوا أي حاجة أيا كانت ودة تكرر معانا النهاردة واحنا جايين في العربية في إنه بنبقى مقيدين وبيبقى الكلابش قافل على ايديك وبتبقى بتشعر بالالم خصوصا في جو زي ده، ومع ذلك بتتحط في عربية وبيتقفل عليك مرة تانية ولما بتطلب ده يتبصلك بقرف اللي هو أنت بتطلب إيه".
وتابع دومة دفاعه عن نفسه محدثًا هيئة المحكمة: "سبب الأزمة الرئيسية هو إننا على باب حجز داخل مبنى جوه معهد أمناء الشرطة داخل منطقة طرة اللي هى كلها منطقة عسكرية مسلحة، ومع ذلك الناس مصُريين يدخلونا بالكلابش واحنا مقيدين جوة الحجز و يقفلوا علينا.. هي دي الدعوى إننا مقيدين ولما اشتكينا من الخيط وخبطنا على الباب دخلت قوة من حرس المحكمة واعتدوا علينا بالضرب ولما عملنالهم محاضر إننا تم الاعتداء علينا بالضرب و هيئة المحكمة اللي كانت بتنظر في القضية اللي كنا هنا بسببها ناظرت هذه الإصابات في الجلسة اللي الأساتذة أكيد هيعرضوها على حضراتكم في نفس اليوم يمكن قبلها أو بعدها مش متأكد".
واستكمل دومة روايته عن واقعة الاعتداء عليه ودفاعه عن نفسه: "كانت الداخلية بتعمل محضر قصاد محضر ويقولوا دول شتمونا وضربونا، مش متأكد الحقيقة من التهم الموجودة لو افترضنا جدلا، وأنا أقول إن هذا ليس صحيحا إننا شتمناهم، فأرجوكم افتحوا تحقيق من الأول في الواقعة كلها وشوفوا مين بدأ بالاعتداء من الأصل، ده رقم واحد، وإذا افترضنا جدلا وهو ما لم يحدث إني اعتديت أنا أو الزملا عليهم بالشتم أو غيره لأننا كنا مقيدين، وثانيا لأنهم كانوا حوالي 20 واحد أو أكتر من 18 واحد على 3 في الغرفة، واحنا التلاتة مقيدين واعتدوا علينا بالضرب ولو سمح لينا بالاطلاع على تفريغ الكاميرات فالمحكمة هتتأكد من اللي حصل فأرجوكم ومش علشان الست شهور، بس أرجوكم عاقبوا المجرم الحقيقي.. إذا سمحت المحكمة بالانتقال دلوقتي لغرفة الحجز في شئ ربما نقول على سبيل الاستدلال لو ميصحش إنه يبقى دليل هيأكد على حقيقة اللي حصل".
كانت محكمة جنح مستأنف المعادي، قررت تأجيل جلسة استئناف أحمد ماهر، وأحمد دومة، ومحمد عادل، على حكم حبسهم 6 أشهر، في واقعة اتهامهم بالتعدى على ضباط شرطة داخل حجز معهد الأمناء، أثناء محاكمتهم على ذمة إحدى قضايا، لـ22 مايو للمرافعة.
وعقدت الجلسة برئاسة المستشار محمد صلاح، وعضوية المستشارين محمد الضبع وحاتم الخطيب، وبحضور محمود علي ممثل النيابة وسكرتارية محمد السعدني.