مودي الإمام يحيي ذكرى وفاة شقيقه: لسه مستني رنة تليفونك وسؤالك عن صحتي
مودي الإمام يحيي ذكرى وفاة شقيقه: لسه مستني رنة تليفونك وسؤالك عن صحتي
أحيا الفنان مودي الإمام، اليوم، ذكرى وفاة شقيقه الفنان الراحل حسين الإمام، وذلك عبر صفحته الرسمية بموقع "فيس بوك".
وتذكر الموسيقار شقيقه الأكبر، من خلال استعراض عدد من المواقف التي جمعت بينهما، حيث قال: "أنا لسه باحس وأنا بعدي الشارع، إنك هاتاخدني من إيدي عشان أبقى في أمان وماتوهش، لسه عاوز أحكي لك أنا قد إيه بقيت سباح ماهر، وعن الشجرة العالية اللي تسلقتها، وعن آخر حيلة علمتها لروي كلبنا".
وأضاف مودي الإمام: "لسه حاسس إني محتاج أوريك قد إيه أنا عازف ماهر على الدرامز والبيانو، والجيتار، ورسام ممتاز زي ما علمتني، لسه مستني تزورني عشان تعلمني چودو ومصارعة روماني، ونغني سوا، ونضحك لما عينينا تدمع زي ما اتعودنا، ولسه عاوز أطبخ لاثنين، عشان لو اتصلت وزرتني ناكل سوا وندردش، ونعزف ونغني".
وتابع: "لسه مستني رنة تليفونك وسؤالك عن صحتي، وأحوالي بإلحاح زي عوايدك، ولسه حاسس إنك هتزعق، وتخلي بلطجية حوش المدرسة يجروا من قدامك زي الفراخ وأنا واقف جنبك، قصير وفخور، ومزقطط، ولسه عاوز أثبت لك قد إيه أنا بقيت قوي، وماهر، وفاهم، وشجاع".
وواصل "مودي" قائلا: "لما بتكلم مع نفسي وأنا لوحدي بسمعك في صوتي، وبهدا، وأطمئن، وارتاح، ماعنديش شك إننا هانجتمع تاني زي عوايدنا، ونعزف سوا، ونغني كإننا روح واحد، لكن له عقلين، وجسمين، كل سنة وأنت بكل خير وسعادة، يا أخويا الكبير الحبيب.. يا حسين".
ويوافق اليوم الذكرى الثانية لوفاة الفنان الكبير حسين الإمام، الذي رحل عن عالمنا في 17 مايو 2014.
