رمضان أحلى مع أهل «حارة صقر».. زينة وفانوس وقعدة حلوة

10:22 م | الأحد 12 يونيو 2016

بعد 15 يوماً طرقوا فيها أبواب الشقق السكنية بحارة «صقر» البسيطة بمنطقة حلمية الزيتون، طلباً للمساهمة فى شراء زينة رمضان كعادتهم، لكن على غير العادة رفض أغلب الجيران الدفع هذا العام، بسبب غلاء الأسعار، الأمر الذى دفع شباب «صقر» إلى إدخال السرور على قلوب أهالى الحارة بالخروج إلى الشارع، حاملين «الجردل» و«الألوان»، لعمل رسومات زينة رمضان على الجدران بأقل تكلفة.

«رمضان أحلى مع أهل حارة صقر، اللهم بلغنا رمضان، وبشر الصابرين».. الكلمات التى رسمها «وليد محمد»، صاحب الفكرة، وأصدقاؤه بالحارة على جدران الشارع، ويزيد عليها الفوانيس والزينة بألوان مبهجة، بدلاً من شراء زينة رمضان المكلفة، ويقول: «اتعودنا كل سنة نلم فلوس الزينة ونعلقها، لكن السنادى كتير اعترضوا ومدفعوش عشان الحاجة كلها غليت وكل اللى جمعناه 30 جنيه بس، وقتها فكرت نشترى دهانات ملونة ونرسم بإيدينا الزينة زى زمان».

لم يتخيل الشاب العشرينى أن ارتفاع الأسعار يصل إلى زينة رمضان، التى أصبح المتر منها بـ25 جنيهاً: «ماكنتش فاهم إن الأسعار بقت غالية فى كل حاجة كده، ده متر الزينة السنة اللى فاتت كنا بنشتريه بـ6 جنيه وعلى دخلة رمضان، عشان كده الناس ماقدرتش تدفع واللى دفع كان على القد ومحصلش تمن متر واحد».

5 ساعات، الوقت الذى استغرقه «وليد» وزملاؤه لإتمام رسومات زينة رمضان، قبل قدوم الشهر الكريم بأيام قليلة، تاركين الفرحة والابتسامة على وجوه الأهالى، بحسب «وليد»: «رد فعل الناس أسعدنا جداً، وحسسنا إننا عملنا حاجة كويسة، وكفاية إننا مقطعناش عادتنا»، وتابع: «قررنا نتعب شوية فى الرسم، بس نفرح جيرانا فى رمضان ولمتنا فى الشارع وسط الزينة زى كل سنة، وربنا ما يقطع لينا عادة والأسعار ترجع زى الأول».