«محمد» غادر المستشفى بعد استئصال «الزايدة».. فعاد بـ«التصاق فى الأمعاء»

10:45 م | الخميس 23 يونيو 2016

فى واحدة من غرف قسم الجراحة بمستشفى المطرية التعليمى، يرقد محمد حسين عبدالحميد، الشاب الذى لم يكمل عامه العشرين بعد، مريضاً وحيداً فى غرفة كبيرة، جاء إلى المستشفى ذاته قبل شهر، لإجراء عملية «الزايدة»، ومنذ إجرائها وحتى الآن، لا يعرف تحديداً ما الذى حدث له، فبعد إجراء العملية بيومين، انتابه «مغص» شديد، علم بعد ذلك أنه نتيجة انفجار داخل بطنه.

{long_qoute_1}

تروى «نورا» تفاصيل أزمة شقيقها: «قعدنا فى المستشفى يومين كمان بعد العملية، وبعد كده قالوا لنا إنه بقى كويس وإن إحنا نقدر نمشى، بعد ما روّحنا البيت محمد تعب جداً تانى يوم، وكان عنده مغص جامد مش عارفين من إيه، رجعنا على طول للمستشفى تانى، بس محدش رضى يستقبلنا، طلعنا على مستشفى سيد جلال، عملوا شوية إشاعات على محمد ولقوا إنه فيه انفجار حصل فى بطنه، وما رضيوش يقبلونا عندهم، وقالوا ارجعوا للدكتور اللى عمل العملية تانى».

وأضافت: «قالوا لنا إنه فيه عملية تانى ممكن تتعمل، لأنه عنده التصاق فى الأمعاء، وطلبوا مننا دم، وفعلاً اتبرعنا بـ4 أكياس دم وبعد كده قالوا لنا مفيش عملية، والدكتور قال لنا إنه العملية فيها نسبة خطورة وهو بيرجح إنها ما تتعملش، ولما قلنا له ليه طلبتم مننا نتبرع بالدم، قال لنا اعتبروه لله». وقالت باتعة أحمد، والدة المريض: «لما اشتكينا لمدير المستشفى، قال إنه الدكتور ده أصلاً عامل له مشاكل، وادانا ورقة وقال لنا اطلعوا اعملوا فيه محضر».

من جانبه، قال عزالدين ثابت، الطبيب الذى أجرى العملية، استشارى الجراحة العام بمستشفى المطرية: «محمد جالنا المستشفى وكان عنده التهاب حاد فى الزايدة، عملنا له العملية بالمنظار وشيلنا الزايدة، وشيلنا على قد ما قدرنا من الالتهابات والصديد، وبعد كده حصل عنده التهاب تانى لما خرج من المستشفى، وهو دلوقتى أفضل من الأول بكتير»، مستدركاً: «أنا عرفت إنه هما اشتكوا لمدير المستشفى، وإن هما راحوا عملوا فيا محضر، بس أنا ما يفرقش معايا كل اللى هما بيعملوه ده، كأنى أطرش».

ورفض الدكتور أسامة عابدين، رئيس قسم الجراحة بمستشفى المطرية، الإدلاء بتصريحات حول وضع المريض، فى حين أكد الدكتور مأمون حسن، نائب المدير العام للمستشفى، تشكيل لجنة من 3 استشاريين بقسم الجراحة، لفحص حالته.