«هبة» تعيد تدوير «الكراكيب»: «بَعمل من الخشب لوحات»

11:45 م | الأحد 03 يوليو 2016

«كراكيب».. كلمة لا تقع فى قاموس الفنانة الشابة هبة عيسى، التى نجحت فى تطبيق المثل الشعبى الشهير «يعمل من الفسيخ شربات»، حيث قررت أن تحول أى قطع قبيحة فى محيطها إلى نماذج جميلة، صحيح أنها درست التصوير الزيتى فى كلية الفنون الجميلة، إلا أنها تؤمن أنه بإمكان الجميع أن يكونوا مصدراً للجمال والبهجة.

قطعة خشب من الأبلاكاش البالى، كانت من ضمن الكراكيب التى تنتظر الانتقال إلى صندوق القمامة بمنزلها، لكنها قررت أن تغير مسارها، لتحولها إلى قطعة فنية حقيقية بقليل من الألوان وكثير من الخيال، المسألة ليست تحدٍّ بقدر ما هى تطبيق لمبدأ تؤمن به الشابة: «ماينفعش نقف ساكتين قدام القبح، لازم نحوّله لجمال، الموضوع مش محتاج أكتر من قدرة بسيطة على الرسم وفهم معقول بخلط الألوان، والنتيجة غالباً مبهرة».

تشجع «هبة» معارفها وأصدقاءها على مواجهة القبح: «حاجات كتير قديمة فى محيطنا، ممكن بلمسات بسيطة نخليها قطع جمالية، القبح مش فى القمامة والحاجات المرمية، فيه نوع من القبح اسمه القبح النمطى، بيتكرر قدام عنينا مع كل مرة يظهر فيها، زى شنطة اللاب توب مثلاً، حاجة من ضمن الكراكيب، شكلها قديم ومُقبض، قررت أسيب بصمتى عليها، بألوان جواش وأكريليك، وممكن زيت كمان».

تؤمن «هبة» بأن أسوأ أنواع القبح هو ذلك النمطى الذى يتكرر باستمرار أمام العين: «يعنى الحاجات اللى شكلها مش مميز، النوع ده بنشوفه فى الشنطة اللى فيه منها فى السوق ملايين، الفستان اللى ممكن البنت تلبسه ويكون مغرق المحلات».. تتمنى الكاتبة الشابة صاحبة رواية «شيطلائكية» لو يفيق الناس من ثبات القبح: «نفسى الناس تفهم يعنى إيه جمال، وإنه مختلف من شخص للتانى، مش حاجة معلبة نشتريها على أنها جميلة فى حين إنها قبيحة جداً».