ابن شقيق "حمادة": قول الحق دول "عرّوك".. وحمادة يقسم "لم يغصبني أحد على الكلام وبيعاملوني "أحلى معاملة"

في مواجهة بينه وبين ابن شقيقه، ببرنامج "مصر الجديدة"، على قناة "الحياة 2"، أشاد حمادة صابر المواطن المسحول أمام قصر الإتحادية، بوزارة الداخلية والأطباء الذين قاموا بمعالجته، وقال "البلد لسة بخير"، وأضاف "أنا راجل على قد حالي". كما وجه عتابه للأمن وقال: "راجل مضروب بخرطوش المفروض يهدوه شوية"، وأضاف "ربنا نجاني بناس.. عايز ايه اكتر من رتب كبيرة تتأسفلك وأكيد القيادات مش هتقبل اللي حصل ده". تدخل رضا ابن شقيق حمادة، في الحوار في مواجهة هاتفية، "انت خايف من ايه قول الحق.. دول عرّوك"، فرد "حمادة"، أقسم لك بالله ماحد غصب عليا"، والخرطوش جاء من الخلف. وقال رضا "الناس تتبرأ منك بسبب أكاذيبك.. ماتخافش، القضاء هيجيب لك حقك، هما بيضحكوا عليك". وكان رد "حمادة"، "انت هتعمل زي بنتي وتكدب وتقول أنا كنت معاك.. انت كنت في الجيش وماشفتنيش، الناس شايلني فوق دماغهم ورحبوا بيا". وبنبرة حادة قال ابن شقيقه، "أقسم بالله ماحد هيلمسك والله لو حد لمسك هاندمهم.. دول عرّوا عورتك"، فقال حمادة، "أنا ماقلتش غير الحق، والعساكر غلطوا وهما عساكر زيك كدة لو هما غلطوا يأخذوا جزاءهم، والناس بيعاملوني أحلى رعاية".