بالفيديو| "مافيا العقارات" تخرب بيوت أهالي الهرم.. والمخالفات "تدخل الأدراج"
العقار المخالف
شوارع ضيقة لا يتجاوز معظمها الـ5 أمتار، ذات مبانٍ شاهقة الارتفاع يصل بعضها إلى 12 دورا، كثافة سكانية عالية وشبكة تحتية من المرافق لا تقوى على قضاء حاجة ساكنيها، ففي شارع هاشم مبروك المتفرع من شارع زغلول بحي الهرم، بُني عقار مكون من 13 دورا بجوار عقار مكون من 3 أدوار، ما أدى إلى تشقق العقار الصغير منذ أكثر من عامين حتى أصبح آيلا للسقوط.
"أنا صاحب عقار مكون من بيت أرضي ودورين، جم 4 شركاء اشتروا البيت الملاصق ليا وهدوا البيت وبدأوا يبنوا الدور الأولاني واشتكينا الحي وفي كل مرة ييجوا ياخدوا فلوس ويمشوا".. كلمات قالها عصام فرج خطاب، تعليقا على العقار الذي تم بناؤه بجوار منزله الصغير، موضحا: "ابتدى البيت بتاعي يحصل فيه تشققات وتصدعات وابتديت أروح لبتوع العمارة اشتكيلهم قالولنا إحنا هنرمملكم بعد ما نخلص".
وعود أصحاب العقار المجاور له ذهبت جميعها أدراج الرياح بعدما تمكنت الشقوق من منزله وأصبح بيته آيلا للسقوط "جابولنا 2 فواعلية وفي الآخر أنا دفعت فلوسهم من جيبي وبرضه البيت بتاعي بقى آيل للسقوط"، يضيف خطاب "العمارة الجديدة مش معمولة بأسامي اللي بنوها ومعموله بأسامي ناس تانية ودي مخالفات فجة".
حاول خطاب رفع الظلم الذي وقع من جانب أصحاب العقار المجاور له بالتوجه إلى المحافظة للشكوى "توجهت للمحافظة بشكوى في لجنة التفتيش والمتابعة بمحافظة الجيزة طلعت قرار بإزالة العقار وتوجهت للواء اسماعيل عبدالواحد وبجهود مضنية طلع قرار إزالة للعقار، وبالفعل نزلت قوات الأمن لإزالة العقار لكن لما جم كسروا آخر 4 أدوار على البيت بتاعي وبيتي بقى آيل للسقوط أكتر وإسقاط العمارة كان شيء صوري من المحافظة".
وأضاف خطاب "في آخر شهر رمضان تم تكسير العمارة من الدور الـ13 والعمارة ليها 4 جوانب والحي لما جه هد الجانب الملاصق لبيتي، والطوب كان بينزل زي الصواريخ لحد ما كسروا البيت بتاعي"، لحظات من الخوف والهلع عاش فيها عائلته، يوضح "إحنا كنا قاعدين في البيت في رعب وكأن قنابل نازلة علينا من فوق، وكل ده بسبب منظومة فساد المحليات".
"إحنا عايشين في البيت الصغير ده وماكنش لينا أي علاقة بحي الهرم أو قسم الهرم ولا لينا علاقة بيهم" كلمات قالها طلعت خطاب، أحد قاطني العقار، موضحا "لحد ما جالنا ناس من مافيا العقارات ماعندهمش أي اهتمامات غير بالفلوس وبناء العقارات واكتشفنا أننا قدام منظومة من المافيا متكاملة وطلبنا منهم أننا نعمل محاضر وماكنش بيتعمل محاضر، ولما بنطلب منهم يزيلوا كانوا بيرفضوا يزيلوا العقار كله بالرغم إن القرار طالع بإزالة على سطح الأرض ومع ذلك هدوا أجزاء من آخر 4 أدوار".
لم تقتصر المشكلات التي سببها أصحاب العقار الجديد لأصحاب العقار القديم عند هذا الحد، ويضيف خطاب: "أحد شركاء العمارة بعت واحدة لأختي علشان يهددها ويقولها لو اتكلمتي هنخلص عليكي، وفي مرة نفس الشخص طلع الطبنجة من جيبه وهدد والدتي وساعتها عملنا محاضر وكان فيه شهود".
نجحت عائلة "خطاب" في الحصول على قرار للإزالة من قبل حي الهرم، يحكي خطاب ما حدث له عند بدأ الإزالة "لما رئيس الحي اللواء إسماعيل عبدالواحد قالهم يالا يا جماعة كسروا وكان فيه أمن وكان الموضوع كله عبارة عن حماية لمافيا العقارات وهد من جانب العقار بتاعنا وبيت بيتهد 40 مترا على بيت 6 متر ولما اشتكيناه قالنا (علشان تعرفوا إن فيه إزالة)".
يضيف خطاب "لما روحت من فترة أعمل محضر مخالفة أعمال قالي صاحب العقار (أنا دافع 50 ألف جنيه ومحدش يقدر يهد العمارة)، إلى أن توجهت لحي الهرم وحررت محضر لمخالفة الأعمال، ولما لقيت مافيش تنفيذ صدق كلام صاحب العقار اللي قال إنه دفع 50 ألف جنيه بالرغم أن فيه غرامة بمليون و250 ألف جنيه".
يختتم خطاب حديثه قائلا: "المخالفات كانت بتتعمل وتتحط في الأدراج ولما ضغطنا عليهم طلع قرار إزالة ومشي في المحكمة وبقى قضية وابتدا يتحرك للنيابة ويكون قضية والمفروض يحصل تنفيذ للقرار ومنظومة الفساد لسه بتساعد مافيا بناء العقارات ومش مهم أرواح الناس والعقار سارقين كهرباء ومياه".