عمرو سلامة لمخرج "اشتباك": "كنت صح وأنا اللي غلط"
المخرج عمرو سلامة
نشر المخرج عمرو سلامة، تفاصيل ما دار بينه وبين صديقه المخرج محمد دياب، منذ طرح عليه فكرة فيلم "اشتباك" وقرأ مسودته الأولى.
وجاء في منشور عمرو سلامة على "فيس بوك": من ثلاث سنين، من أول ما سمعت فكرة فيلم Clash - اشتباك وقريت أول مسودة من الفيلم، اعترضت تماما على صنع الفيلم ده، وترجيت الأخوين دياب مايعملوهوش، وأسبابي كانت كالتالي:
1) ليه تعمل حاجة ضد تيار التخلف والعنصرية والاستقطاب والكره؟
كان رد محمد دياب: "ده دوري، والأحسن إني أحاول أفض الخناقة وهي شغالة، إيه قيمة انك تفض خناقة بعد ما خلصت؟"
2) الفيلم هايتمنع، ليه تعمل مجهود يتمنع أو على الأقل يتشوه؟
كان رده: "هي ديه معركتنا اللي دورنا نخشها ونحارب لها، وده قدرنا في البلد ديه لو بنعمل حاجة بجد".
3) مين عايز يسمع عن الثورة؟ مين عايز يفتكر الاشتباكات والغاز والصدمات ديه كلها، ده إذا كان أنا نفسي مش عايز افتكرها.
كان رده: "لو الفيلم عن بني آدمين، وعن معاني إنسانية حقيقية، ومكتوب صح، الناس هاتتفرج وتتأثر وتتمتع، وده دوري إني أكتبه بشكل يمتع الناس لو اشتغلت كثير عليه"
4) الكلاب هاتحاول تعضك.
كان رده: "عارف، وربنا يقويني"
5) والأهم.. الفيلم تنفيذه مستحيل، اللي مكتوب وقريته ده يا يتنفذ بميت مليون جنيه يا اما يتصور على مدار عشر سنين، ده احنا بيطلع عيننا في اخراج مشهد في أكثر من اثنين بني آدمين يجلسان يتحدثان، عايز تجيب ألف ممثل يمثلوا اشتباكات؟
كان رده: "لو معانا منتجين وكرو (طاقم عمل) شاطرين وممثلين حابين شغلهم وبيحبوا الفيلم ومؤمنين بيه، هانقدر".
واختتم عمرو سلامة حديثه قائلا، إنه، "وبعد مرور ثلاث سنين، وبعد الاحتفاء بالفيلم في "مهرجان كان" وإعجاب رموز سينمائية عالمية بالعمل، وبعد رؤيته كيفية استقبال الجمهور للفيلم في العرض الخاص، وبمناسبة خروجه للنور غدا، لديه جملة واحدة يوجهها لمحمد دياب: (أينعم بتخنق من عندك وإنك مش بترضي غروري وتسمع نصيحتي، بس إنت كنت صح، وأنا كنت غلط)".