وقفة تضامنية مع الجنيه: «روح يا شيخ.. ربنا ينفخ فى صورتك»

11:07 م | الأربعاء 27 يوليو 2016

«لو صعبان عليك اللى بيحصل فى الجنيه تعالى وانضم لنا.. ولو انت مصرى بجد تعالى واقف معانا وقفة رجالة وادعم الجنيه»، هكذا دعا عدد من شباب حى دار السلام إلى وقفة احتجاجية بميدان التحرير، ليعلنوا تضامنهم مع الجنيه بعنوان «وقفة مع الجنيه المصرى»، دفاعاً عن العملة المصرية التى تعرضت لإهانة بسبب عدم صمودها أمام الدولار، «كل الناس بتطلع تعتصم، اللى عشان اتفصل من شغله أو مرتبه قل، والأصل فى كل ده هو تراجع قيمة الجنيه»، قالها أحمد الشامى، منسق الوقفة.

قرابة الـ500 مواطن تواصلوا مع «الشامى» حتى الآن، معلنين انضمامهم للوقفة التى أعلن عنها مطلع الأسبوع الحالى على صفحته على موقع «الفيس بوك»، إلا أنه ما زال ينتظر الحصول على التصريحات الأمنية للبدء فى إعلان موعد الوقفة وأماكن الانطلاق: «إحنا مش هنهتف ضد حد، إحنا هناشد الرئيس يلحق الجنيه قبل ما نبقى ملطشة.. ولافتاتنا هتبقى علم مصر وفى قلبه الجنيه».

لم تكن الوقفة الوحيدة التى سيدعو لها الشاب الثلاثينى خلال الفترة المقبلة، فهو يتوقع تراجع قيمة الجنيه أكثر من ذلك طالما أن المسئولين لم يحاولوا التصدى للأزمة منذ بدايتها: «طول ما الجنيه قيمته بتتراجع إحنا كمان مش هيبقى لنا قيمة وسط الشعوب.. ومش هنسمح لأى فصيل سياسى زى الإخوان إنه ينضم لينا، إحنا هدفنا واضح وهو دعم الجنيه وبس»، مضيفاً: «إحنا هنتواصل مع بعض خبراء الاقتصاد وناخد منهم حلول، ونكتبها على اللافتات اللى هنرفعها فى الوقفة، لأننا بندق ناقوس الخطر، وكمان بنقول للمسئولين إحنا بنفكر معاكم ودى حلول مقترحة».