ما تقولش «همبرجر وسوسيس» لو هتسخن خد «مليجى».. لو جعان خليك فى «خادنشى»

08:23 م | السبت 30 يوليو 2016

«أنا شغال فى مجال الأكل سواء مطاعم أو فاست فود فترة مش قليلة»، هكذا بدأ «أمجد مصطفى» صاحب كشك H-House للمأكولات، حديثه عن بداية علاقته بالصناعات الغذائية، «سِبت كلية فنون تطبيقية وبدأت كنادل فى مطعم، واكتشفت بعد فترة أن المجال كبير وواسع، فحاولت إنى ألِم أكبر قدر من الخبرة عشان أقدر أكبر فى المجال ده، وأن يكون ليا حاجة باسمى، أو عالأقل أكبر فى مكان معين، وانتقلت من مكان لمكان وشفت كذا ستايل، زى الساندوتشات والبيتزات والعصاير، وهكذا».

وعن معنى اسم الكشك وما يقدمه استكمل أمجد حديثه، «H-House جاية من Home-made-House وده لأن الأكل كل خاماته بتتعمل فى البيت، من أول اللحمة اللى بتتفرم وتتعمل برجر أو سوسيس مثلاً والعيش التورتيلا والسلطات والمخللات، حتى الخضرة والتوابل بحاول أنى أزرعها فى جنينة صغيرة جنب الكشك، والأكل بيتطبخ عالجريل قدام الزبون وياكله وهو واقف، وبعض التوابل اللى مش متوافرة هنا ببعت لناس معارفى بره يبعتوها لى من تايلاند مثلاً، وكمان ماعنديش توصيل طلبات عشان أنا من أعداء الأنتخة».

{long_qoute_1}

وعن أفكار الساندوتشات المختلفة، «أفكار الساندوتشات الجديدة بتجيلى سواء وأنا واقف فى المطبخ فى البيت وبجرب، أو من الزباين، يعنى كان فى واحد اسمه «مليجى» واقف مع زمايله فاقترح أننا نعمل سوسيس عليه هريسة شطة وعسل نحل جنب الكاتشب والمايونايز، ودخل تحدى مع صحابه، فعملناه وإحنا واقفين وعجب الناس فاتثبت فى المنيو باسمه، وفى حاجات بتكون موجودة قبل كده، زى البرجر اللى عليه بصل متحمر ومشروم سوتيه، فأنا حطيت التاتش بتاعى وسميته (السِكسى) بعد مشاورات مع الزباين برضه».

واستكمل الحديث عن الساندوتشات المُنتظرة، «أنا عندى فكرتين جداد، بجربهم على أهلى وأصدقائى المقربين لحد ما يزهقوا، وبعد كده هنزلهم، واحد مِكس بين الفراخ والسوسيس والسلامى مع الجبنة الموتزريلا فى لقمة صاج، بس هيكون الساندوتش كله مقلى فى الزيت، وده هسميه (خادنشى) على لقب خالد الشبوكشى بطل ألعاب القوى المصرى اللى طلعوه عليه فى جُزر القُمر لما ماعرفوش ينطقوا اسمه، والساندوتش التانى هيكون تشيكن بصوص كارى وصوص الصويا زى الأكل الصينى بس هيكون ساندوتشات وعليها جبنة بقى، بس مش أطباق». «الدعاية بتاعتى كانت مختلفة، يعنى بدأت عالنت وكنت بعمل عروض لزباينى، يعنى مثلاً جايلى جروب صحاب، فبديهم ساندوتش أو اتنين من الحاجات الجديدة، بحاول أكون صديق الزبون، فى حدود الأدب والاحترام طبعاً، وده طبعاً بجانب السوشيال ميديا زى الـFacebook، وتأثيرها اللى طلع أكتر مما أتخيل فى نشر ثقافة الأكل، لأن الأكل زيه زى أى حاجة فى الدنيا ما هى إلا فن وثقافة!».

وعن أكبر المشاكل التى واجهته قال «أمجد»: «أكبر مشاكل كانت البحث عن مكان وتخليص التراخيص، وفى يوم وأنا ماشى لقيت فاترينة أكل فى المكان اللى أنا فاتح فيه دلوقتى، وسألت على صاحبها وأجّرتها منه وجددت الترخيص، وخلصت ورق المياه والكهربا وبدأت أذوَّق المكان بقى وبنيته على أيدى لحد ما بقى على شكله دلوقتى».

وعن طموحه المستقبلى تحدث «أمجد»: «نفسى أبدأ brand مصرى فى الأكل يهتم بالجودة والصحة وبيهتم بالشكل، عكس الماركات العالمية التى بتهتم بالدعاية والشكل أكتر ما بتهتم بالجودة والقيمة الغذائية للزبون».