«أحمد»: لم أتوقع ما تعرضنا له من تعذيب ومعاناة في ليبيا

08:06 م | الجمعة 12 أغسطس 2016

يسرد أحمد عبدالتواب، من محافظة الفيوم، تفاصيل الكابوس الذى عاشه منذ اختطافه فى ليبيا، وحتى عودته أمس لأرض الوطن، ويقول: «اللى حصل ده كان كابوس وغم وانزاح والفضل فى كدا يرجع للرئيس عبدالفتاح السيسى، والفريق خليفة حفتر، ورجال السلطات المصرية والليبية». {left_qoute_1}

«شغّال فى ليبيا من 3 سنين فى مجال المعمار، دخلت الأراضى الليبية بأوراق رسمية، ولم نكن نتوقع أن يحدث ما حدث لنا من تعذيب ومعاناة، بدأ الكابوس لما قامت ميليشيات مسلحة بتثبيتنا واحتجازنا فى أوضة ضيقة».

تابع: «كان التعذيب ليل نهار من جميع الأشخاص الذين احتجزونا وخدوا كل فلوسنا اللى كانت معانا وبعد ما عملوا فينا كل حاجة ممكن تتخيلها من ضرب وتعذيب لدرجة إننا كنا بنوصل لمرحلة إننا كنا فاكرين إننا موتنا خلاص، مش لسه هنموت، كنا نردد الشهادتين طوال الوقت، ولم يخطر فى بالنا أن نعود لمصر مرة أخرى لحد ما سابونا».

أضاف «عبدالتواب» أن القوات الخاصة الليبية وأجهزة الأمن المصرية كان لها الفضل فى عودتنا مرة أخرى، بعد أن تبادلوا المعلومات والتنسيق مع بعضهم، مضيفاً: «التعاون ده كان سبب فى أنه يتم إنقاذنا من كمين أكبر للميليشيات المسلحة مكناش هنعرف نخرج منه، وفضلنا قاعدين عند القوات الخاصة الليبية طوال يوم الخميس وهما اللى قاموا بتأمين طريق عودتنا بالتعاون مع الأجهزة السيادية فى مصر لحد ما رجعنا إمبارح لمصر».

أشار إلى أن الأوراق الرسمية التى دخل بها ليبيا مع 22 آخرين من العائدين، 6 منهم من محافظة سوهاج وواحد من محافظة المنيا و7 من المنصورة و9 من الفيوم، كانت مجهزة معهم للعودة إلى مصر، مضيفاً: «كنا خايفين ومش داريين بحاجات كتير بتحصل حوالينا، وكنا بنفتكر نفسنا متنا خلاص، وعشان كده بأنصح إخواتنا المصريين اللى لسه موجودين فى ليبيا يرجعوا، واللى بيفكر يروح ميروحش،

وحاجة تانية مهمة إن اللى هناك وعايز يرجع ياريت ميسترخصش ويرجع بالطيران ويدفع ألف دينار ليبى بدل ما يستخسر ويرجع برى بـ500 دينار ويحصل فيه اللى حصلنا».

أخيراً أحب أشكر للرئيس عبدالفتاح السيسى اللى بعتبره كبير العائلة المصرية على المجهود الجبار اللى عمله معانا عشان نرجع، وأقول اللى يروح جحيم ليبيا برجليه دلوقتى يبقى غلطان، مستطرداً: «كمان لازم نشكر وزير النقل اللى أصدر تعليمات مشددة بتسهيل جميع الإجراءات أمامنا خاصة فى منفذ السلوم البرى، حيث تم فتح صالة vip فى الميناء، وإعفاؤنا من كافة الرسوم المقررة داخل الميناء، ومش بس كده، لا ده كمان قدموا كل الدعم الطبيى واللوجيستى لكل العائدين، فكل العاملين بالأجهزة العاملة بميناء السلوم وجدوا عشان يدعمون ويفضلوا معانا لحد ما نرجع بيوتنا لأهلنا فى المحافظات.