«الجُرسة قبل الكلابش».. افضح الحرامى والمتحرش

08:25 م | الأحد 28 أغسطس 2016

قبل يومين كان طارق غنيم، الموظف الشاب، يجلس كعادته بعد انتهائه من العمل، على المقهى القريب من منزله بمدينة الشروق، فوجئ بشاب يتجاوز الـ30 عاماً يحاول سرقة منزل بدور أرضى، المشهد أثار حفيظة «طارق»، فأصر على عقاب الشاب الحرامى الذى حاول الهرب، لكنه نجح فى إمساكه بمساعدة رفاقه والجيران، وحاوطوه على الرصيف لتصويره قبل الإبلاغ عنه، ورغم توسلات الحرامى بأنه «أول مرة يسرق وآخر مرة» بحسب «طارق»، فإنه أصر وعشرات الجيران على عدم إطلاق سراحه إلا بتصويره وتجريسه قبل حضور رجال الشرطة، ويقول: «ده أكبر عقاب لأى حرامى أو متحرش، إنه يتجرس بصورته قدام الناس كلها، ودى عقوبة انتشرت فى الفترة الأخيرة، عشان كده كان عندى إصرار على أن أجرسه أكبر تجريسة من قبل ما أبلغ عنه».

تصوير الحرامى ونشر صوره على مواقع التواصل الاجتماعى، كانت الخطوة الأكبر من الإبلاغ عنه، التى أنهى بها «طارق» مهمته معللاً: «ما كنتش متوقع إن صورته هتنتشر على فيس بوك وتبقى فى كل حتة من قبل ما الشرطة تقبض عليه، واكتشفت بعدين إنى الجرسة اللى عملتها للحرامى ساعدت فى فصله من محل هو شغال فيه، بعد نشر صوره على الفيس بوك والتعرف عليه، وده أكبر عقاب للحرامى والمتحرش اللى عايشين فى وسطنا وما نعرفهمش، لأن الاتنين واحد وكلهم مجرمين».