تاكسى ده.. ولا «استوديو تحليلى»؟

08:53 م | الاثنين 29 أغسطس 2016

تاكسى مُميّز، ألوانه ليست أبيض وأسود كما هو دارج، بل أبيض وخطان باللون الأحمر، فى إشارة إلى حب صاحبه وتشجيعه لنادى الزمالك: «أنا زملكاوى وأفتخر» عبارة كتبها «عماد الديوكى» على سيارته الأجرة، معلناً خوضه أى مشكلة فى الشارع بسبب تعصُّبه لناديه الأبيض: «ساعات عربيات بتزنّق علىّ فى الطريق، وقبل ما ادخل فى وصلة خناق ألاقى السواق يضحك ويقول لى أنا هاسيبك علشان زملكاوى زى حالاتى، فأرد عليه: حصل خير وربنا يُستر علينا».

{long_qoute_1}

تاكسى أبيض، يتحول إلى استوديو تحليل كروى فى حالة ركوب زبائن مهتمين بالكرة، وأحياناً يكون هناك تعصّب إذا كان الزبون أهلاوياً: «أصل أنا زملكاوى جداً، بنقعد نحلل الماتشات فى التاكسى، ولما حدّ يستفزنى باستفزه وأقول له الزمالك ده النادى الملكى».

يُشجّع «عماد» الزمالك منذ كان فى العاشرة من عمره، وابناه «أحمد» و«رؤية» مثله، لدرجة أن ابنه يبكى فى حالة خسارة الزمالك، عصبية السائق لناديه، تُهوّن عليه مشكلات الحياة، تلهيه عن الصعاب فيقول دائماً للزبائن: «والله بندارى أمور كتير ورا الكورة مش أكتر من كده، نتكلم عن الكورة شوية وننسى مصاعب الحياة، الزمالك بيهوّن علىّ ويخرجنى عن مشاكل الحياة وارتفاع الأسعار ووجع القلب».

كان «عماد» دائم الذهاب إلى الاستاد لتشجيع ناديه، «التالتة يمين» هى عشقه، يحكى عن الاستاد دائماً: «الاستاد واحشنى أوى، كان ابنى بيروح معايا، اللى بيروح الاستاد مرة بيبقى عايز يشجع فريقه على طول». يحكى أيضاً عن لاعبى الزمالك الذين يحبهم كثيراً، يقول لزبائنه: «أكتر لعيب لبس الفانلة البيضا وباحبه هو حبيبى شيكابالا، وأيمن حفنى ومصطفى فتحى، وطبعاً حازم إمام الكبير المحترم اللى كل الناس بتحبه».

يؤكد «عماد» أن التعصُّب موجود: «ده لو الأهلى بيلاعب فريق بره مصر باشجع الفريق اللى بره، والزمالك لما بيلاعب فريق بره هما مابيشجعوش الزمالك، سيبك من كلام إيد واحدة، ده إحنا بنصقف ونهيص لما الأهلى يخسر».