دكانة كتب مستعملة لنشر الثقافة بين الشباب
كتب مستعملة بأسعار رمزية
قلة أعداد القراء التى باتت فى ازدياد مستمر، كانت تسيطر على تفكيرهم عندما قرروا إطلاق مشروعهم «دكانة كتب» لتشجيع المصريين على العودة مرة أخرى للقراءة وبالتالى رفع المستوى الثقافى، خصوصاً لدى الشباب.
«فكرتنا ببساطة هى تقديم كتب مستعملة بأسعار مخفضة جداً يمكن أقل من سعرها اللى فى السوق بأربع أو خمس مرات بس عشان الناس ترجع تقرا مرة تانية، وجزء من خدمتنا أون لاين من خلال موقع يحمل اسم دكانة كتب»، كلمات تامر محمد، المسئول عن الموقع، فالكثير من الشباب يتحجج بصعوبة القراءة للعديد من الأسباب، على رأسها ارتفاع أسعار الكتب خصوصاً الجديدة: «المشكلات اللى بتواجه الشباب دى حاولنا نحلها، من خلال موقعنا على الإنترنت، فالشخص ممكن يشوف أى كتاب هو عايز يشتريه، ولو ماعجبوش يرجعه لينا من غير أى فلوس، وده بيأكد إن هدفنا مش الربح لأ إحنا هدفنا الحقيقى هو إن الناس تقرا». لا يوفر الموقع، بحسب «تامر»، الكتب العربى فقط، بل الكتب الأجنبى وبأسعار تصل إلى 25 و30 جنيهاً: «فيه ناس بتحب الكتب الأجنبية بس مش بيقدروا يشتروها لأن أسعارها الغالية وده لسببين، إما لأنها بتتباع فى المكتبات الكبيرة، أو أنها مستوردة حديثاً بعد أزمة الدولار، عشان كده إحنا بقينا نشترى نفس الكتب الموجودة فى السوق ويمكن تكون جودتها أقل شوية، لكنها تفى بالغرض المطلوب». الوصول لكافة الشرائح المجتمعية من الشباب ظهر فى «دكانة كتب» من خلال وجود معيارين للكتب، فهناك الكتب التى تتميز بالجودة العالية، أو متوسطة الجودة: «بكده إحنا بنخدم الكل، سواء الطبقات المتوسطة مادياً أو الأعلى قليلاً بأسعار مناسبة لكل منها». اختيار اسم «دكانة كتب» كان مقصوداً: «دكانة اسم مصرى قديم للمحلات، وإحنا استخدمناه علشان يعبر عن فكرتنا الخاصة بخدمة المجتمع وتاريخه وثقافته».