مستشفى بينيس المركزى.. «لافتة» من غير «مبنى»

07:49 م | السبت 24 سبتمبر 2016

«مستشفى بينيس المركزى»، لافتة تعلو بوابة خرسانية مفتوحة على مساحة كبيرة تمتد إلى فدانين ونصف الفدان لكن ما وراء اللافتة أرض فضاء دون مبنى بمدينة الحامول فى كفر الشيخ، بعد أن جاء قرار لهدمها قبل عام لإعادة بنائها من جديد، لكن بقيت بقايا الهدم واللافتة كأنه مكان مهجور احتلته الكلاب الضالة والثعابين والرمال وأكوام القمامة.

{long_qoute_1}

صالح فتحى، يسكن بالقرب من الأرض التى كانت تحمل مبنى المستشفى قبل أن يهدم بأكمله دون إنشائه مرة أخرى، يؤكد أنه لا بديل للمستشفى التابع للحكومة، حتى يبقى الحال كما هو عليه بحسب الرجل الخمسينى: «المستشفى كان فيها كل الأقسام، وتشمل غرف عمليات ضخمة وحضانات كبيرة للأطفال، لكن كان الإهمال محاصرها فى كل حاجة، لدرجة إن مكنش فيه إمكانيات ولا أدوية، وفجأة هدموها عشان يبنوها تانى على نظام أحدث، وعدت سنة ومحدش قرب ليها». لم يجد «صالح» وجيرانه حلاً للحفاظ على أرض المستشفى بعد هدم مبانيه، التى صارت مرتعاً للبلطجية لممارسة أعمال منافية ليلاً واتخاذها وكراً على مرأى ومسمع من الجيران دون أن يستطيع أحد التدخل على حد قوله: «مفيش أى نوع من التأمين على البوابات ولا جواها، من سنة المبنى هدموه وبقى مكان للبلطجية وشرب المخدرات وتثبيت الناس وسرقتهم، ومفيش أى نوع من الرقابة ولا حتى بديل لمستشفى حكومى تانى فى البلد نتعالج فيها»، مناشدات وبلاغات عديدة توجه بها «صالح» والأهالى للمسئولين لبناء المستشفى من جديد بعد هدمه: «كلمنا كتير مجلس المدينة وكل اللى عليهم وعود بأن المستشفى هتتبنى تانى، لكن مش عارفين لحد إمتى المستشفى هتتبنى، وهتفضل مكان للبلطجية وبس، وإحنا نموت، خصوصاً إن أقرب مستشفى لينا سفر مش أقل من ساعة، يعنى يكون اللى تعبان مات لحد ما يوصل».

الميزانية دائماً تكون المشكلة، فبحسب عبدالحميد مغفور، نائب رئيس مجلس مدينة الحامول، أنه لم تحدث أى إنشاءات جديدة منذ عام لعدم وجود ميزانية تكفى: «بناؤها لسه فى الدراسة مع المحافظة لأن تكلفتها هتبقى عالية جداً، وقريب هنبدأ فى بنائها مرة أخرى»، وهو أثار غضب الأهالى متسائلين: «يعنى يهدوا وبعدين يدرسوا؟».