فى الكافيه: مشروع التخرج: قوتنا فى لمتنا
فى الكافيه: مشروع التخرج: قوتنا فى لمتنا
أثناء إحدى جولات فريق «أصحاب» على مقاهى القاهرة بمدينة مصر الجديدة، وبعد دخولنا لأحد المقاهى بها، وجدنا مجموعة من الشباب والفتيات، وعلى الرغم من أن الوقت كان بعد الظهيرة وجدناهم منشغلين بعمل ما، اقتربنا منهم وشاركناهم جلستهم وبسؤال أحدهم عن سبب تجمعهم، قال طارق رمضان، 22 سنة: إحنا متجمعين النهارده عشان نحط الأساسيات بتاعة مشروع تخرجنا من الكلية السنة دى، ومحبيناش نبدأ متأخر وده أول اجتماع لينا، بعد ما ظهرت نتيجتنا وفرحنا كنت خايف جداً وقلقان من موضوع «البروجكت» وكنت حاسس إن الموضوع هيبقى كتير علينا خصوصاً إننا كنا ناويين نعمل الجروب بتاعنا «4» أفراد بس هم اللى هيقوم عليهم المشروع وده جهد كبير علينا تحديداً قسم علاقات عامة وإعلان لأن البروجكت بتاعنا محتاج شغل، بعد كده فكرت إنى أكلم حد وحصل فعلاً قبل بداية السنة كلمت صاحب ليّا قريب منى وعرّفنا على بقية الجروب إلى بجد لحد يومنا ده بيشتغلوا من قلبهم فى «البروجكت» وحابين فكرة المشروع قوى.
وأضافت نورهان هانى، 22 سنة: أهم حاجة فى مشروعنا إننا نكون متعاونين وميحصلش أى مشاكل بينا الحمد لله، زى معظم بقية المشاريع، بالعكس إحنا بننزل نتقابل بشكل أسبوعى فى أى كافيه عشان نتفق ونتكلم فى المشروع وبتبقى قعدة بشكل ودى أكتر منها شغل، وتانى حاجة إحنا قررنا نعمل كل حاجة بنفسنا، وكل واحد مننا له دور، وأهم حاجة يبقى معانا عضو مسئول عن تصميم الإعلانات وده صديقنا حسام اللى بيعمله والحقيقة هو شال عننا كتير خاصة فى التكلفة، وبقية الشغل متقسم علينا، ويكفى إننا تقريبا الجروب الوحيد اللى مش استعان بأى حد من بره.
وأكملت يارا محمد، 22 سنة: بغض النظر عن قناعاتى عن إن مشروع التخرج ملوش لازمة رغم كل التعب والمجهود المبذول فيه لأنه ما هو إلا بيزود عدد ملفات الأرشيف اللى فى الجامعة أنا بالنسبة ليّا حصيلة الاستفادة كانت إنى اتعرفت على ناس جديدة بتشتغل بجد وبتتعاون عشان تطلع شغل حلو حتى لو مش هنستفيد منه، وفعلاً مشروع التخرج ده من الحاجات اللى بتعرّفك حقيقة الشخص اللى قدامك، لأنك ممكن تكتشف صاحبك ميطلعش صاحبك، والشخص اللى بتكرهه يطلع كويس وتحبه.
وأكمل حسام مصطفى، 22 سنة: المشاكل اللى بتحصل فى أغلب مشاريع التخرج بيبقى سببها إننا مش متعودين على شغل الورش أو العمل الجماعى، طيب ليه إحنا منتدربش عملى فى الكلية أو حتى على الأقل نتدرب عملى وعلى الشغل الجماعى، وحتى الواحد يعرف يختار زمايله اللى هيشتغلوا معاه فى المشروع بعدين.