سنة أولى اغتراب: «اطلبوا العلم فى المدن الجامعية»

08:48 م | السبت 24 سبتمبر 2016

شيماء شعبان، طالبة بالفرقة الأولى بكلية الطب البيطرى بجامعة القاهرة، قطعت مسافة سفر تزيد على 5 ساعات من مدينتها فى الواحات البحرية لتلتحق بالمدينة الجامعية، تقول: «جيت النهارده علشان أقدم فى المدينة الجامعية علشان أفضل من السكن بره وهتوفر لى فلوس الأكل والشرب والمواصلات ووقت علشان أذاكر كويس وأجيب تقدير يشرفنى».

وتضيف: «مسافة السفر من الواحات للقاهرة 5 ساعات وقت مش قليل ومسافة بعيدة وبسبب بُعد المسافة ممكن أقعد فى المدينة أسبوعين أو أكتر مش هشوف فيهم أهلى أو أصحابى ومكالمتهم فى التليفون مش هتكون كافية بس هستحمل علشان أحقق هدفى اللى بسعى عليه من زمان علشان ما عندناش كليات فى الواحات والجيزة تعتبر أقرب محافظة لينا». أما سامية سعيد، الطالبة بالفرقة الأولى بكلية التربية، فقد جاءت من محافظة بنى سويف لتلتحق بالمدينة الجامعية: «متضايقة جداً علشان أصحابى اللى كانوا معايا فى الثانوى مش هيكونوا معاى فى الجامعة وهكون بعيدة عن أهلى وهقعد أسبوع كامل مش هشوفهم ودا هيكون صعب علىّ علشان أنا مش متعودة أسيب بيتنا كتير». وتتابع: «القاهرة زحمة جداً وجوّها مختلف تماماً عن بنى سويف وحاسة إنى هكون بعيدة عن أهلى وأصحابى وإن شاء الله أقدر أستحمل علشان أكون حاجة فى المستقبل». وعلى الشباك المجاور يقف إبراهيم محمد الذى جاء من المنصورة برفقة أخته شيماء الطالبة بكلية الهندسة ليقدم لها أوراقها لتلتحق بالمدينة الجامعية، تقول شيماء: «أخويا جاى معايا لأنى لسه ما أعرفش حاجة وكنت أتمنى تجيلى كلية فى بلدى بس الحمد لله نصيبى كده إن شاء الله ربنا يعيننى على الغربة دى».