كل واحد ينشط السياحة بطريقته

09:11 م | الثلاثاء 27 سبتمبر 2016

كان محمد فتحى يتحدث مع «ميراندا» السائحة الإيطالية بشأن إحدى الحلى التى تنتمى إلى زمن الخلافة الإسلامية من أجل إقناعها بشرائها، وبعد مفاوضات حول السعر، وافق «محمد» على تخفيضه مقابل شرط واحد قاله بلغة إنجليزية سليمة هو أن تخبر سكان بلدها أن مصر بلد آمن يمكن لأى أحد زيارته.

بعد أن غادرت «ميراندا»، فوجئ «محمد» بزميله فى المحل المجاور يقول له: «انت بردو مش هتبطل العادة دى، كل زبون ييجى تقوله الكلمتين دول، فاكر إن الكلام هو اللى هيرجع السياحة، انت بتحلم»، عمل «محمد» بالغردقة ثم شرم الشيخ والأقصر كبائع حلىّ سياحية، عانى كثيراً بسبب التدهور الذى أصاب قطاع السياحة وجعل حركة البيع والشراء شبه متوقفة، ما جعله يفكر فى طريقة لاسترجاع السائحين، فاهتدى إلى طريقة الترويج للسياحة من خلال السائحين الذين يترددون عليه وهم قلة: «السياحة شبه واقفة وده دمر شغلنا، يعنى حالياً لو لقينا زبون فى اليوم يبقى رضا، أيام ما كنت شغال فى الأقصر ماكنتش بشوف السياح إلا كل 3 أيام، عشان كده فكرت إنى أعمل دعاية بطريقتى، وهى إنى أطلب من السائحين الترويج لمصر فى بلادهم، لعل وعسى يكون كلامى ليهم سبب فى انتعاش السياحة».

يفعل «محمد» ما فى وسعه من أجل عودة السياحة، يبذل جهداً فريداً ويأمل أن يكون أحد الحلول: «الواحد مش عارف يعمل إيه، يعنى أنا مثلاً لا عارف أتجوز ولا أصرف على نفسى، لأنى كبرت لقيت نفسى فى الشغلانة دى وماعرفش حاجة غيرها من وأنا عندى 9 سنين».

لا تختلف ردود فعل السائحين أمام كلماته، فدوماً يردون بالترحيب: «اتعلمت إنجليزى مخصوص علشان أقول الكلمتين من غير ما أغلط والأجانب يفهموها صح».