الأحذية: «تمن الجزمة أكتر من مرتب شهر»

09:07 م | الأربعاء 28 سبتمبر 2016

يقف إسماعيل السيد زكريا، 20 سنة، فى محل الأحذية المملوك لوالده، يراقب حركة المارة فى شارع الخان، يقف بعضهم أمام باترينة معروض فيها «أحذية رياضية مستوردة من الصين»، يسألون عن أشكال أو مقاسات أخرى، لكنه يجيبهم بالنفى. يقول «إسماعيل»: «الحال واقف، علشان شحنة الجزم وقفت فى الجمارك، ضمن حاجات كتير اتمنعت من الاستيراد»، ويؤكد أن تجارة الأحذية فى مصر قائمة على الاستيراد، سواء من الصين أو من أى دولة أخرى، ما يعد أزمة كبيرة، على حد قوله.

{long_qoute_1}

أما عن المنتجات المصرية من الأحذية، فيقول «إسماعيل» إن سعرها زاد أيضاً، بسبب استيراد المواد الخام، خاصة الإكسسوارات التى يتم وضعها على الأحذية، ويتم استيرادها من الصين، كذلك معظم الجلود تكون مستوردة، ويضيف: «الزبون المصرى دايماً بيفضل المستورد، ونادراً لما تلاقى حد بيرضى يلبس جزم مصرية الصنع». ويبرر «إسماعيل» عزوف الزبائن عن شراء أحذية محلية الصنع لعدة أسباب: «فيه أخطاء فى التصنيع، يا إما فى تلبيس الحذاء، ويكون غير مريح تماماً أو غير مناسب للمشى، وأحياناً فى الشكل النهائى للمنتج، (الفينشينج) بتاعه مبيبقاش شكله حلو، أما السبب الأخير، فهو أن معظم الموديلات تكون موضة قديمة لا تناسب الشباب».

يقول «إسماعيل» إن الأحذية الصينية درجات، وليس كل المنتجات المستوردة من الصين رديئة، فهناك أحذية عالية الجودة، وأحذية أقل، لكن معظم المستوردين، يعتمدون على الأحذية الأقل سعراً، لأنها تحقق هامش ربح كبيراً.

بينما تقول نرمين محمد هادى، 22 سنة، موظفة فى إحدى شركات الاتصالات، إنها لا تقوم سوى بشراء أحذية عالية الجودة، وتحمل علامات تجارية عالمية، مضيفة: «الجزم اللى مش مريحة بتتعبنى، أهم حاجة إنى ألاقى جزمة بتريح رجلى، ودى مش رفاهية، أنا بتعب لو وقفت ساعة بجزمة مش صحية». تؤكد «نرمين» أنها فوجئت بأسعار الأحذية ترتفع وتتضاعف بشكل جنونى، حيث أصبح أقل حذاء رياضى ذو علامة تجارية عالمية، يصل إلى 1600 جنيه، أما الأحذية المخصصة للجرى، التى تتضمن ما يحمى القدم من الصدمات أثناء المشى، فيصل سعرها إلى 3 آلاف جنيه أو أكثر.

«مش بنشترى علشان العلامة التجارية والمنظرة، بس أمى كمان ست كبيرة، وبتحتاج جزمة صحية، وإحنا من الطبقة المتوسطة، الجزمة الصحية مش رفاهية».