بالصور| انهيار "أسانسير" في مول كبير بالرحاب
المصعد
شهد مول City Square في مدينة الرحاب، سقوط أحد المصانع بشكل مفاجئ صباح اليوم، ولم يسفر الحادث عن وقوع ضحايا.
وكتب مصطفى نمرة، المحلل الاقتصادي، عبر صفحته على "فيس بوك": "كنت في City Square الصبح في الرحاب، وركبت أسانسير، وخرجت منه ودخلت بعدي بنت، وفي أقل من دقيقة تقريبا أسلاك الأسانسير اتقطعت ووقع وتحطم تماما زي ما انتو شايفين في الصورة، والحمد لله البنت ربنا نجاها".
وتابع نمرة: "بعيدا عن إني حاسس اني هربت من الموت وانه هيفضل يطاردني كل يوم زي فيلم Final destination، وبعيدا عن إني اتأكدت النهارده انك على بعد ثانية من الموت طول الوقت، لازم حد يتحاسب على الإهمال والمهزلة دي، خصوصا اننا مش بنتكلم عن سقوط أسانسير في مبنى حكومي متهالك قي الصومال، ده في مكان رأسمالي هادف للربح ومتأجر بالكامل تقريبا لأحسن مطاعم وكافيهات في مصر، يعني مش معقول مش عايزين نضحي بشوية أرباح في مقابل شراء أسانسير محترم من شركة كويسة".
وأضاف المحلل الاقتصادي: "في نظرية اسمها Six degrees of separation، بتقول انك دائما على بعد 6 أشخاص بالكتير لأي حد انت عايز توصله، يعني مثلا لو عايز توصل لشخص معين، هتلاقي حد صاحبك يعرف فلان اللي يعرف فلان اللي يعرف فلان اللي في النهاية يعرف الشخص اللي انت عايزه، وانا دلوقتي متأكد تماما إني على بعد أقل من 6 أشخاص للوصول لأصحاب سيتي سكوير وأصحاب الشركة اللي ركبت أسانسير الإهمال والموت ده".
واعتبر نمرة، أن تحرير محضر بالواقعة لن يفيد في شيء، مطالبا الجميع بمشاركة الصور لحماية آلاف العائلات والأطفال التي تزور المول يوميا، ولتغيير المصاعد الرديئة ومحاسبة الجناة، قائلا: "الأمل في تغيير أي حاجة في البلد دي، فينا إحنا، المجتمع، الحكومة الحقيقية".