طفل يستوقف محافظ الدقهلية: باخد دروس بـ 105 جنيه في الشهر حرام ده وألا حلال

01:55 م | الخميس 27 أكتوبر 2016

"هو فين المحافظ، عاوز أقول له كلمتين، أنا جيت السوق مش علشان أشترى سكر، أنا لازم أقابله وأقول له الكلام بنفسي".. بتلك الكلمات وقف الطفل محمد بالصف الرابع الابتدائية بمنية النصر، ينادي أمام موكب حسام الدين إمام محافظ الدقهلية، وقيادات المحافظة قبل مغادرتهم إستاد منية النصر لحضور القافلة الغذائية في قافلة "رد الجميل الثالثة" لبيع الأسعار بنصف الأسعار.

وتوقف المحافظ على صوت الطفل واستدعاه، فقال: "أنا في الصف الرابع الابتدائي، ودرس التقوية في المدرسة المادة الواحدة بسعر 35 جنيه، وأنا باخد دورس في 3 مواد، يعني محتاج من أبويا كل شهر دروس 105 جنيه، غير إخواتي كل واحد فيهم محتاج دروس ومصاريف، حرام ده ولا حلال".

وأضاف الطفل: "إحنا أسر فقيرة لازم الحكومة تخفف دروس التقوية، وأنا عايز أتعلم".

وتعجب المحافظ والحضور من شجاعة الطفل، وقدرته على توصيل شكوته للمحافظ والحضور، ورد المحافظ: "ربنا يحيمك يا ابني إنك قادر تعبر عن مشكلتك وحاسس بأسرتك هذه الإحساس الجميل"، وغادر الطفل المكان في هدوء بعد أن انتهى من كلامه.

ووعد المحافظ، بمخاطبة وزير التربية والتعليم بتخفيض أسعار دروس التقوية بالمدارس الموجود في المناطق الريفية لتتناسب مع دخول أولياء الأمور.