مالقوش فى «منوفى» عيب.. قالوا له «يا منوفى»

08:04 م | الجمعة 28 أكتوبر 2016

مواقف غريبة يتعرض لها بسبب اسمه، ذات مرة وأثناء وقوفه بأحد الشوارع، وأمامه بعض الخردة التى يشتريها من سوق الثلاثاء، لبيعها، نادى عليه أحد المارة بصوت ساخر: «إيه يا منوفى، عامل إيه يا راجل يا منوفى؟»، فنظر له، ثم قال بتعجب: «أيوة اسمى منوفى إيه المشكلة يعنى وبحب اسمى هتبرّا منه يعنى؟».

يستاء «منوفى عبدالله» من سخرية الناس من اسمه، ومن فكرتهم عن الشخص ذى الأصول المنوفية: «أنا أصلاً صعيدى من قنا، بس رحت المنوفية كتير، ناس حلوين وبتوع واجب وآخر حلاوة، المنايفة والله ناس كُرما، ويا ريت الناس تغير الفكرة دى عنهم». يضحك «منوفى» أحياناً عندما يسأله أحد عن سر تسمية والده له بهذا الاسم، رغم أنه من جذور صعيدية فيقول: «والله ماعرفش، حتى مالحقتش أسأل أبويا اللى مات وأنا عندى 4 سنين، بس أنا طلعت لقيت اسمى منوفى فى شهادة الميلاد وفرحان بكده».

يبدأ «منوفى» الذى يسكن فى منطقة إسطبل عنتر بإصلاح الخردة الموجودة أمامه أثناء وقوفه بشارع حسين مصطفى بمصر القديمة، ويقول: «كنت شغال موظف أمن وحراسة فى وزارة الآثار وطلعت على المعاش، واشتغلت فى الخردة عشان أسترزق منها». يعود «منوفى» إلى اسمه الذى يميزه: «من زمان من وأنا فى المدرسة والناس بتضحك على اسمى ويقولوا لى يا منوفى، أنا ما كنتش أعرف كانوا بينادوا عليا ولا بيتعجبوا من اسمى، فاكرين هيغيظونى، بس أنا أزعل ليه، هى منوفى دى ما لها يا إخوانا، مش بزعل خالص».