«أبوعادل»: «ابنى نام على الأرض 3 أيام.. والغلبان محدش بيسأل فيه»

07:53 م | الثلاثاء 22 نوفمبر 2016

وجوه مهمومة يكسوها الحزن، تفترش الأرض أمام مدخل مستشفى قصر العينى التابع لجامعة القاهرة، تصرخ بأعلى صوتها «حسبنا الله ونعم الوكيل، رحمتك بالغلابة يا رب» ويجلس بينهم «أبوعادل» ومعه ولده المصاب بكسر فى ساقه، إثر تعرضه لحادث «موتوسيكل».

{long_qoute_1}

يروى «أبوعادل» لـ«الوطن» معاناته من الرعاية داخل المستشفى، ويقول إنه جاء إلى مستشفى قصر العينى بعد علمه أنه يٌعالج الحالات بالمجان، ويكمل «جئنا للمستشفى ونمنا على الأرض 3 أيام لحد ما أى دكتور ييجى يسأل علينا وبأكلم الدكتور مش عاوز يرد عليَّا، بيعاملونا معاملة زى الزفت، والراجل الغلبان اللى زى حلاتى نايم زى لا مؤاخذة الكلب، محدش بيسأل فيه، بييجى الممرض يبص عليه مرة واحدة، وإدارة المستشفى خلتنى أشترى طلبات بـ3 آلاف جنيه، مع إنى جيت مفيش فى جيبى غير 50 جنيه، والدكتور أجبرنى على شراء جهاز للساق وجبت الجهاز بـ450 جنيه، نفسى أعرف فين المجانية، ده غير المصاريف التانية، ومرة خرجت الساعة 2 بالليل ولفيت أكتر من ساعة علشان أجيب مستلزمات للعملية قبل العملية بيوم»، وتابع «أبوعادل» قائلاً: «أنا شغال أرزقى، وبقالى أكتر من شهر فى المستشفى بأصرف، رغم إن كل الناس قالت لى العلاج فى القصر ببلاش، لكن اتضح لى إن مفيش حاجة ببلاش، المريض فى المستشفيات المجانية هو بس اللى ببلاش، النظافة فى المستشفى زى الزفت وجبت بطاطين معايا، وخرجت أكثر من مرة اشتريت علاج وحقن وأدوية من بره، وكله على حسابنا، والحمد لله إن ربنا سترها معانا، وابنى طلع على خير، مفيش لا دكتور ولا ممرض عاملنا كويس، ولما سألت الدكتور ابنى عامل إيه؟ استحقرنى وما ردش، وفى النهاية اقتنعت إن العلاج المجانى كدب على الناس وذل، ومش عارفين إيه اللى مستخبى للغلابة تانى فى البلد دى».