بالصور| مواطنون في يوم المقاطعة: عندنا ضروريات منقدرش نستغنى عنها

02:28 م | الجمعة 02 ديسمبر 2016

رغم دعوات جهاز حماية المستهلك لمبادرة مقاطعة الشراء في الأول من ديسمبر لمواجهة الغلاء، فإن حركة البيع والشراء سارت بشكل طبيعي كما هو معتاد رغم المطر، وانقسم المواطنون لقسمين، الأول لم يسمع عن المبادرة، والآخر تجاهلها رغم علمه بها، لعدم اقتناعه بتأثيرها.

يقول عبدالله محمد بائع من العتبة: "حركة البيع زي ما هي كل يوم، مفيش حاجة اتغيرت النهارده عن أي يوم، مينفعش الناس لا تبيع ولا تشتري، لو عايزين يظبطوا الأسعار فعلا ينزلوا على المحلات والتجار يراقبوهم، مش يخلوا الناس تقاطع، هي الناس أصلا مبتشتريش زي الأول، مش محتاجة حد يدعيها للمقاطعة".

{long_qoute_1}

أما شادية عمران، التي كانت تتجول في العتبة في محاولة منها للشرا، تقول: "جيت النهارده عشان بقضي مصلحة واشتري كمان، سمعت عن الامتناع عن الشراء، لكني مستجبتش، ده مشروع فاشل، طيب ما أنا ممكن اشتري قبلها بيوم أو بعدها بيوم، لو تقدري تستغني عن الأكل واللبس يبقى قاطعي، لكن مفيش حد هيقاطع، الشعب عنده ضروريات لا يمكن الاستغناء عنها، المقاطعة مش حل، التاجر هو كمان هيعمل إيه، ما الغلاء علينا وعليه".

ويضيف إسحاق مجدي، بائع أحذية: "البيع مريح بقاله كذا يوم، والنهارده زي امبارح، الناس النهارده اشترت عادي، مش مقاطعة ولا حاجة، بس في انخفاض في نسبة الشراء بشكل عام عشان مفيش بضاعة بعد ما قفلوا الاستيراد".

بدورها، تقول إيمان محسن، كانت تتجول في العتبة للشراء أيضا: "لم أسمع عن مبادرة مقاطعة الشراء النهارده، ولا في التليفزيون ولا أي حاجة، وبعدين مش هنقدر نحكم الشعب كله وندفعه للمقاطعة، إحنا مش بتوع مقاطعة".

"العملية نايمة طبيعي، هي ناقصة مقاطعة، الناس أهي بتشتري"، يقولها محمد البغدادي، بائع ملابس في العتبة: "مفيش مقاطعة في الملابس، الناس جت تشتري رغم المطر، وإحنا لو في الطين هننزل نبيع لأن ده أكل عيشنا، لا بيفرق معانا حملات مقاطعة ولا غيره".