بعد نقلهم لـ«سوق الكونيّسة».. بائعو الجيزة: «هنا أحسن من الشارع»

07:40 م | الجمعة 16 ديسمبر 2016

إقبال كبير شهده سوق «الكونيّسة» بمنطقة العمرانية بالجيزة، وذلك بعدما اتخذ المحافظ قراراً بنقل الباعة الجائلين إليه، كل فى مكان مخصص له، مع تخصيص قوات لتأمين السوق.

«أم أحمد»، بائعة خضار، قالت: «بالنسبة لى هنا أحسن كتير، كنت فى الأول بقعد فى الشارع على جنب، لكن هنا ليا مكان خاص، وكمان كنا فى الشتا بنتبهدل من المطر»، وتواصل: «كنت بتعب من السرقة لكن هنا أمان، فيه أمن مسئول عن السوق فبسيب الحاجات بتاعتى وأنا مش خايفة». «البلدية بتيجى كل ما حد يبلغها إن فيه حد بيقعد بره السوق.. ودى أحسن حاجة».. يقولها تامر محمد، بائع فاكهة، ثم يضيف: «جيت السوق هنا من 3 أيام وكنت فى الأول بفرش فى الشارع، واللى بيخلى الزبون قليل عندى إن فيه ناس بتحاول تفرش بره».

{long_qoute_1}

ويقول وحيد سيد، جزار: «كنت بشيل كل يوم جرادل الميه على كتفى عشان أغسل الحاجة وكنت باروّح من الشغل تعبان كل يوم.. لكن دلوقتى بادفع 450 جنيه إيجار بس أحسن لى من قعدة الشارع، هنا فيه حنفية ميه متوفرة، وفيه صرف صحى والناس اللى بتيجى تشترى خضار بتشرى اللحمة بالمرة، فكل حاجة هنا موجودة ومنظمة». «السوق هنا كويس ليا وللزبون.. المكان بيوفر لى مكان أقعد فيه وبيوفر وقت الزبون لأن كل حاجة متاحة وجنب بعضها فبيشترى مرة واحدة».. تقولها منى سعد، بائعة جبن، وتتابع: «كان السوق فى الأول أرض فاضية وكنا قاعدين فيها بشكل مهرجل وماكانش فيه ناس زى دلوقتى وقالوا لنا اطلعوا منها 4 شهور عشان نعمل سوق، وفعلاً طلعنا وقعدنا فى الشارع سنة وكنا بنشوفهم كل فترة بيظبطوا السوق لحد ما رجعنا وانا استلمت مكانى من 3 أيام». وأوضح إبراهيم على، مدرس، أن فكرة نقل الباعة الجائلين لسوق مخصص لهم فكرة جيدة.

أما إيمان السيد، ربة منزل، فتقول: «كنت فى الأول باخد وقت كبير عشان أشترى طلباتى بسبب الزحمة والمكان فى الشارع كان ضيق أوى، لكن دلوقتى كل حاجة متوفرة قدامى وباشترى براحتى، هنا فيه أكتر من بائع للصنف الواحد، فباختار البائع اللى بيريحنى فى السعر». ويقول على عبدالصالحين، مشرف السوق، إن السوق يتكون من 61 باكية تضم أكشاك لحوم ودواجن وأسماك وخضراوات و20 «فرشة» لباعة اليوم الواحد، وتم عمل عقود مع الباعة لمدة 5 سنوات مع دفع مبلغ فى نهاية كل شهر، حسب المكان المخصص، بالإضافة إلى ترقيم كل باكية خاصة بالبائع.