«أحمد»: كل واحد شايل كفنه على إيده

08:00 م | الخميس 22 ديسمبر 2016

بملابس مهندمة، يجلس أحمد فهمى، الشاب الثلاثينى، مع أحد أقاربه، يتحدث إليه عن يوم عمل طويل وشاق فى تنظيف منزله الملىء ببقايا السيل، يقول أحمد: «أنا طول النهار شغال فى تنظيف بيت والدتى من آثار السيول، أنا والدتى ست كبيرة ومش بتقدر تمشى وبيتها فى أقل من دقيقة كان مليان ميه والميه دى معاها الطفلة، ومن بعد السيل ما خلص وأنا كل يوم أروح أنظف لها البيت».

كل مواطن فى رأس غارب يحمل كفنه على يديه خوفاً من سقوط السيول، خصوصاً أن الحكومة لم تبن أى مصدات أو سدود لمواجهة مخاطر السيول مرة أخرى، والأيام تمضى والأمر يزداد خطورة ولكن دون أن تضع الدولة المخاطر التى تواجه رأس غارب فى الحسبان، يقول أحمد: «الخوف كل يوم بيموتنى، أنا فعلاً خايف وكل أهل المدينة خايفين من وقوع السيل مرة تانية، للأسف لغاية النهارده الدولة لم تتحرك فى مواجهة السيول، بقالنا شهرين ومفيش أى حاجة حصلت خالص، لو الجو مطر لمدة ساعتين ممكن رأس غارب تغرق تانى، ومفيش أى حاجة حصلت، كل واحد فينا شايل كفنه على إيده وماشى، أنا بفكر آخد أمى وإخواتى ونمشى من غارب نروح مكان تانى، لكن هنروح فين واحنا مالناش أى مكان نعيش فيه، وكمان شغلى ومدارس أولادى وإخوتى هنا».

ويحكى أحمد قصة حضرته بعد وقوع السيول بثلاثة أيام ويقول: «بعد السيل ما نزل بـ3 أيام كانا كلنا واقفين بنحاول نساعد بعض، فجأة طلعت إشاعة إن السيل نزل تانى، البلد كلها اتقلبت وكل واحد جرى على بيته علشان يلحق ينقذ أهله، لدرجة إن كان فيه واحدة ست كبيرة كانت قاعدة على كرسى متحرك بعجل ماكنتش عارفة تعمل إيه، وحاولنا نساعدها على قد ما قدرنا لكن الحمد لله الموضوع ده طلع إشاعة ومحصلش حاجة»، ويتابع أحمد: «أمى ربنا كتب لها عمر جديد وماكنتش فى البيت ساعة سقوط السيول كانت عند أختى، لكن الحمد لله رحمة ربنا كبيرة، المشكلة إن الجو مش منضبط ووارد جداً إن الأمطار تنزل بشكل مفاجئ والناس لسا مافاقتش من الصدمة الأولى، ربنا يستر»، ويؤكد أن مدينة مرسى علم مدينة سياحية ولم تشهد سقوط أى سيول عليها باستثناء بعض الأمطار الخفيفة، وقامت المحافظة بتأمينها بشكل جيد ضد تساقط السيول، فى الوقت الذى تركت فيه المحافظة رأس غارب تعانى الخوف من تكرار الكارثة مرة أخرى ولم تفعل أى شىء لصد السيول عنها: «18 واحد ماتوا فى السيل اللى فات، مستنيين إيه تانى علشان الحكومة تتحرك، مستنيين البلد كلها تموت يعنى، وعلى فكرة فيه مفقودين كتير قوى مفيش حد يعرف عنهم حاجة، ومفيش حد من المسئولين حاول إنه يبحث عنهم».