طلاب «الثانوية» بعد تطبيق «البوكليت»: «هيوفر الوقت وهيقلل الغش»
صورة أرشيفية
تباينت آراء بعض طلاب الثانوية العامة عقب صدور قرار الدكتور الهلالى الشربينى، وزير التربية والتعليم، بأن امتحانات شهادة الثانوية العامة ستجرى بنظام «بوكليت»، وهى كراسة امتحانية تضم الأسئلة والإجابة فى ورقة واحدة، فالبعض يرى أن ذلك القرار يصب فى مصلحتهم بتقليل نسبة الغش، والبعض الآخر اعتاد على وجود ورقة أسئلة منفصلة عن كراسة الإجابة تمكنهم من مراجعة إجاباتهم بعد الانتهاء من الامتحان.
«دينا»: اتعودت أشخبط على ورقة الأسئلة.. و«كريم»: مش هعرف أراجع بعد الامتحان وأتأكد من إجاباتى
«عرفت إنهم هيخلوا الإجابة فى ورقة الأسئلة من على جروب على فيس بوك بس مركزتش فى القرار لأنه مش فارق معايا»، يقولها كريم جمال، مشيراً إلى أن هذا القرار لن يؤثر كثيراً عليهم، فبدلاً من الإجابة فى ورقة خارجية سيتم الإجابة فى نفس الورقة وبالتالى سيوفر لهم الوقت بالإضافة إلى أنه سيساعد الطلبة على التركيز فى ورقة واحدة. ويضيف «كريم»: «هى حاجة حلوة عشان لما أسلم الورقة مرجعش أراجع وألاقى أخطاء عندى فاتضايق ويؤثر على باقى الامتحانات بس مشكلتها الوحيدة إنى مش هعرف أتأكد من إجابتى».
وترى سلمى صبحى، طالبة فى مدرسة عاطف السادات الثانوية، أن هذا القرار يصب فى مصلحة الطالب فهو يقلل من نسبة الغش التى تحدث فى لجان الامتحان فكل ورقة سيكتب عليها اسم الطالب ورقم الجلوس بالإضافة إلى رقم اللجنة وبالتالى من الصعب تغيير الورق بين الطلبة: «لما هيطبقوا القرار ده كده الورق هييجى على قد عدد الطلاب فى كل لجنة ومش هيبقى فيه ورق زيادة حتى المشرفين مش هيعرفوا يشوفوا الامتحان وده هيقلل نسبة الغش».
أما دينا خالد، علمى رياضة، فقد اعتادت على وجود ورقة خاصة بالأسئلة تكتب عليها أثناء التفكير فى الإجابة، وهو سلوك اعتادت عليه منذ بدأت رحلتها مع الامتحانات، تقول «دينا»: «فيه سؤال بيبقى محتاج منى وقت فى الإجابة بخطط تحت السؤال وأنا بفكر وأحياناً بقعد أدون عليه بعض الملاحظات أو الأفكار عشان أعرف أركز»، تتابع: «اتعودت أعمل صح جنب السؤال اللى حليته ولو فيه سؤال محتاج منى وقت فى الإجابة أو كده بعلّم جنبه عشان أراجعه فى النهاية وده هيبقى صعب لو ورقة الأسئلة بقت جوا كراسة الإجابة، بس طبعاً ده أحسن عشان الطلبة اللى بيغشوا مثلاً عن طريق تبديل الورق».
أما ريم على فتقول: «لما القرار هيطبق ده مش هيسمح لنا إننا ناخد ورقة الأسئلة بعد ما نخلص الامتحان ومش هنعرف نراجع أخطاءنا أو نتأكد من الإجابات إن كانت صح أو غلط، خصوصاً إننا بنستنى نطلع بعد الامتحان عشان نراجع إجاباتنا ونعرف غلطنا فى إيه وكنا صح فى إيه».