خضار بالصراصير.. فقط فى المدينة الجامعية بأسيوط

07:52 م | الجمعة 06 يناير 2017

حالة من الامتعاض والقرف يعيشها إسلام الحادى، الذى يعيش بالمدينة الجامعية التابعة لجامعة أسيوط، حيث يقول إن الوجبات المقدمة لهم فى المدينة عادة ما تحتوى على حشرات، وكان آخرها صرصور وجده غارقاً فى طبق الخضار المقدم له فى وجبة غداء، فما كان منه إلا أن التقط له صورة ونشرها على صفحته الشخصية بـ«الفيس بوك»: «يعنى الأكل مش مستوى عديناها، والعيش فيه سوس وقلنا عادى، ودبان ونفضنا، وعيش محروق وقلنا دا كويس للمعدة، لكن توصل إنهم يأكلونا خضار بصراصير كفاية حرام عليكم».

وقال «إسلام» لـ«الوطن»: «نزلت آكل كالعادة وجبة الغدا خضار وبطاطس مع بسلة وجزر وأرز وربع فرخة، ومخدتش بالى من الصرصار ولما حطيت الصينية على الترابيزه شفته، قرفت جداً ورحت للشخص اللى بيوزع الوجبات قعدوا يضحكوا عادى ومعملوش حاجة فأخدت علبة العصير وسبت الأكل ومشيت»، يقيم «إسلام» فى المدينة الجامعية منذ 3 سنوات وكان شاهداً على وقائع إهمال كثيرة، لكنه لأول مرة يتعرض لهذا الموقف: «مش بيمسحوا ولا يكنسوا الغرف، وبقينا نلاقى دايماً ناموس ودبان فى الأكل، خلاص قرفنا».

المشرفون على المطعم هدأوا من روع «إسلام»، وعرضوا عليه وجبة أخرى، لكنه رفض: «بطنى وجعتنى وكنت هرجع واللى خنقنى أكتر إن المشرفين على المطعم قالوا خد وجبة غيرها بس مرضتش ومشيت، ما هو كله مطبوخ مع بعضه»، وعن تقدمه بمذكرة لرئيس المدينة أو نائب رئيس الجامعة قال: «ما تواصلتش مع حد، كله هينفض، وعلشان كده نشرت الصورة على الفيس بوك علشان الموضوع يوصل بشكل أفضل».