الهدوء يسيطر على شبابيك تغيير العملة فى البنوك بعد الزحام.. ومواطنون: الاقتصاد بيتعافى

04:11 م | الأربعاء 15 فبراير 2017

شهدت البنوك حالة من الهدوء صباح اليوم، أمام شبابيك تغيير العملة، في أعقاب تعافي الجنيه المصري أمامه، وهي الحالة التي لم تحدث منذ قرار تعويم الجنيه في 3 نوفمبر الماضي.

في داخل فرع البنك الأهلي بشارع عبدالخالق ثروت، يجلس أحمد حسني أحد العاملين في الخليج، من أجل بيع مئة دولار، لشراء بعض احتياجاته اليومية، يقول: "انخفاض سعر الدولار مؤشرا جيدا لتعافي الاقتصاد، لكن محتاجين مصر يكون عندها خطة واضحة لتشغيل المصانع والاعتماد على المنتجات المحلية، وده طبعا أفضل من استيراد السلع بالدولار وبأسعار غالية جدا".

ويتابع حسني: "يجب أن تنخفض الاسعار، لأن كل تاجر بقى عامل الحجة الدولار، وده مش هيحصل إلا اذا كان فيه رقابة قوية من الحكومة على الأسواق". ويتابع: "أنا كنت بشتغل في الكويت ورجعت بقالي كام شهر ومعايا نحو 5 آلاف دولار، كل فترة بنزل أغير 100 دولار عشان اصرف منهم، ولما يخلصوا بغير تاني، عشان كده لازم الناس تحس بانخفاض الدولار على أرض الواقع، من خلال أسعار بتنزل وسلع تتوفر، مش بس نسمع عنه في التلفزيون".

وعلى المقعد المجاور لحسني، يجلس رجب محمد، أحد العاملين في شركة سياحة، يقول: "انخفاض سعر الدولار في البنوك، يؤكد أن المشروعات التي يفتتحها الرئيس عبدالفتاح السيسي جيدة، وبدأت تجيب خير".

ويضيف رجب: "يا ريت الدولار ينزل لـ5 جنيه عشان الناس الغلابة تلاقي أكل وشغل، خصوصا إن الحالة واقفة والدنيا صعبة، وأنا بشتغل في شركة سياحة وكل فترة باجي أغير 5000 دولار عشان علينا مديونيات، وطبعا صاحب الشركة نفسه الدولار يغلا عشان يكسب أكتر، لكن إن شاء الله هايرخص".

ويتابع عمرو محمد حسن أحد العاملين في شركة استيراد وتصدير، الأرقام الموجودة على الشاشة حتى لا يضيع دوره في شباك تغيير العملة، 30 دقيقة هي مدة الانتظار المدونة على الورقة التي تحمل رقمه على شباك تغيير العملة، رغم أن الزحام لم يكن كبيرا، يقول: "بقالي تقريبا 20 دقيقة مستني عشان أغير الدولارات اللي معايا، كل أسبوع بابيع على الأقل 10 الاف دولار، لأن الشركة عليها التزامات للعملاء".

يضيف عمرو: "الأسبوع الماضي كنت في البنك الأهلي فرع وسط البلد، وكان سعر صرف الدولار أكتر من 18 جنيه، والنهارده السعر وصل لـ16.40 جنيه، وده مؤشر كويس على إن العملة الأجنبية هاتتوفر في البنوك بشكل كبير وسهل، خصوصا إننا كنا بنعاني من توفير عملة أجنبية للاستيراد".

ويتابع: "سعر الدولار في البنوك أغلى من السوق السودة، وفي عدد كبير جدا من شركات الصرافة قفلت، ومبقتش شغالة، وفي صاحب صرافة قالي إن البنوك مش راضية تشتري مننا الدولارات اللي معانا".

ويقول خالد محرم مدير فرع بنك مصر في ميدان رمسيس: "الأسبوع الماضي شهد زحاما كبيرا من قبل المواطنين على بيع الدولار"، موضحا أن انخفاض سعر الدولار أدى إلى حالة من الخوف لدى مخزني الدولار، وحاول التخلص منه بشكل أسرع حتى لا يتكبدوا مزيدا من الخسائر.

وأضاف محرم، أن الاقتصاد المصري يشهد انتعاشة حقيقية، بدليل الانخفاض المستمر في سعر صرف الدولار. متابعا: "البنك يفتح أبوابه يوميا من الثامنة صباحا وحتى الثامنة مساء لاستقبال المواطنين الراغبين في بيع الدولار".