4 أعوام كعب داير على المشارح.. سهير تبحث عن زوجها: شوفت 45 جثة

06:33 م | السبت 11 مارس 2017

"محدش شاف جوزي عمر".. سؤال أصاب سهير محسن محمد بالهوس في رحلتها للبحث عن زوجها المفقود منذ 4 أعوام، تردده على مسامع أهالي منطقتها بالسيدة زينب، وبين عمال المشارح التي تتردد عليها باختلاف المناطق والمحافظات، وهي تهيم في الشوارع مرددة: "جوزي خرج لشغله الصبح ومرجعش"، تستوقف عابري السبيل كمن فقد عقله، وهي تشير إلى منزلها المجاور من مكان عمل زوجها المفقود، الذي ودعته الفرحة قبل عام غاب فيه الزوج عن حياتها بالكامل، دون أن تعلم إن كان حيًا أو ميتًا.

تحدق السيدة الأربعينية في كل من يمر أمامها، ترى ملامح زوجها في وجوه المارة، أملاً أنها تراه مرة أخرى: "بقالي 4 سنين بدور عليه وعندي أمل أن هلاقيه، إن كان حي أو ميت، المهم أشوفه قدامي ولو ميت أدفنه بأيدي، لأن أول ما غاب عن البيت ومرجعش من شغله، كلموني ناس خطفته وطلبوا مني 150 ألف جنيه ولما مقدرتش ادفعهم اتقطع الكلام معاهم ومعرفش راح فين"، لم تجد "سهير" حل في غياب زوجها بعد خطفه سوى إبلاغ المباحث، والبحث عنه في الشوارع: "عندي 5 عيال بربيهم وبعلمهم أحسن علام عشان يطلعوا رجالة، لكن بخاف عليهم جداً ليحصل زي ما حصل مع أبوهم، بس في النهاية سيباها على الله لأن مليش غيره".

45 جثة، هو عدد الجثث التي رأتهم بنفسها "سهير" والأقرب لمواصفات زوجها، في أكثر من 15 مشرحة، من بينهم في بني سويف والاسكندرية وأسيوط وجسر السويس: "أنا دلوقتي بتعالج من صدري من كتر ما بشم ريحة المشارح اللي دخلتها، وبتعالج نفسياً من كتر جثث الأموات اللي شوفتهم بعد ما جوزي غاب عني، بدور في كل مكان لعل ربنا يعترني عليه، عشان نفسي يهدا قلبي وأعرف له مكان، وعيالي يرتاحوا من عذاب فراق أبوهم وهما مش عارفين مكانه فين؟".