أحد سكان مدينة العبور يصمم إشارات مشاة للحد من حوادث الطرق

05:34 م | الأحد 12 مارس 2017

حوادث طرق لم تتوقف، ما زال الكثيرين تحت وطأة التأثر بحادث أليم، مصابون وقتلى هم حصيلة نزيف الأسفلت الذي لا ينقطع عن أماكن عدة، بسبب عدم توافر كوبري مشاه أو نفق آمن للمارة على الطرق الرئيسية، من بينهم مدينة العبور، فهي مدينة سكانية لكنها تعاني من نفس المشكلة، ما دفع "شكري" ساكن بالعبور لتصميم صور جرافيك لمشروع إشارات عبور المشاة، كحل للحفاظ على أهالي منطقته والأماكن التي تعاني من نفس الأزمة.

"زي ما في إشارات للعربيات، صممت إشارات مخصصة لعبور المشاة، تكون في الشوارع وخصوصاً على الطرق الرئيسية عشان تساعد الناس تعدي في سلام من غير حوادث"، قالها شكري محمد، مهندس كمبيوتر، وصاحب تصميم إشارات عبور المشاة، مؤكداً أن فكرته لا تكلف الدولة الكثير لتطبيقها، لكنها تساعد على وقف نزيف الأسفلت لحين انشاء انفاق آمنه للمارة على الطرق: "زمان كان في شوارع وسط البلد وكتير من المناطق القديمة بيبقى في إشارات مخصصة للمشاة، دلوقتي موجودة بس مش كتير واللي موجودة محدش بيعمل بيها لأن مفيش اهتمام بيها ولا خوف على الناس"، وتابع الشاب الثلاثيني: "الفكرة في وجود إشارات للمارة مش هتكلف المسئولين حاجة، أكتر من أنهم يوقفوا مراقبين على الإشارة وحركة المارة في الشوارع، عشان الحوادث متتكررش ويبقى فيه خساير، وهتبقى اوفر واسرع من انشاء كوبري او ممر مشاه عشان الناس تعدي منه وهينظم حركة المرور يبقى في أمان".

55 ألف جنيه، المبلغ الذي قدره "شكري" لتكلفة إشارات مرور المشاة للطرق الرئيسية بمنطقة سكنه العبور، متمنياً أن المسئولين يتبنوا فكرته للحد من حوادث الطرق بمنطقته: "احنا عندنا حوالي اكتر من 7 طرق رئيسية على مستوى المدينة كلها، وبيحصل عليها حوادث كتير لأن مفيش كباري مشاه متوفرة للمارة بشكل كبير، والإشارة هتحل كوارث كتير".